Норвегияда жосуслик учун ҳибсга олинган шахс ўзини россиялик деб атади

Норвегияда жосусликда айбланган, аввалроқ ўзини бразилиялик Хосе Ассис Жаммария деб таништирган Тромсё университети тадқиқотчиси Россия фуқароси эканлигини айтди ва ўзини 45 ёшли Михаил Микушин деб таништирган. Бу ҳақда Норвегиянинг VG нашри 13 декабр, чоршанба куни Норвегия полицияси хавфсизлик хизмати (PST) адвокати Никлас Хафсмоуга таяниб ёзди. Тадқиқотчи 2022 йил октябр ойида қўлга олинган. Полиция хавфсизлик хизмати гумонланувчининг ҳақиқатан ҳам Россия фуқаролигига эга эканлиги, унинг исми Михаил Микушин бўлгани ва у яширин иш олиб борганини билдирган. Норвегия разведка хизматларига кўра, эркак ноқонуний разведка ва Россия расмийлари учун маълумот тўплаш билан шуғулланган.

У ҳозирда ҳибсда, Жиноят кодексининг 121-моддаси - асосий миллий манфаатларга зарар етказувчи ноқонуний разведка, шунингдек, бошқа давлатлар зарарига ноқонуний разведка бўйича айблов қўйилган. Қўлга олинган шахс уч йилгача озодликдан маҳрум этилиши мумкин.

Тергов бошида PST Россия элчихонасига мурожаат қилиб, эркакнинг исмини айтган ва дипломатлардан маълумотни тасдиқлашни ёки рад этишни сўраган. Хафсмоунинг сўзларига кўра, сўровга жавоб бўлмаган. Айбланувчи айбига иқрор бўлиши ортидан PST Россия элчихонасига янги хат юборди. «Биз ҳозир элчихона Микушиннинг ўзи ким эканлигини очиқлашини интиқлик билан кутмоқдамиз», деди Хафсмоу.

VG сўровига элчихона шундай жавоб берди: «Элчихона консуллик бўлими Хосе Ассис Жаммариянинг Россия фуқаролигига эга эканлиги ҳақида маълумотга эга эмас». VG даъво қилишича, Микушинни ГРУ (2010 йилдан бери - Қуролли кучлар Бош штаби Бош бошқармаси) билан боғлайдиган ҳужжатлар бор. Эркакнинг адвокати Марияна Лозич бу тахминга изоҳ беришдан бош тортди. «У Михаил Валеревич Микушин эканлигини ва қиролликда яшаш учун рухсат олишга ариза беришда Норвегия ҳукуматига нотўғри идентификация маълумотларини тақдим этганини тан олади», деди Лозич.