Дания ҲАМАС терактга тайёргарлик кўришга алоқадор эканини маълум қилди

Дания прокуратурасига кўра, терактга тайёргарлик кўришда Фаластиннинг ҲАМАС гуруҳи иштирок этган. Дания полицияси декабр ойида уч нафар гумондорни қўлга олганини эълон қилган эди.

Фото: Martin Sylvest/AP/picture alliance

Данияда 2023 йил декабрида қўлга олинган ва терактга тайёргарлик кўришда гумон қилинганлар Фаластиннинг ҲАМАС гуруҳига алоқадор бўлган, деб хабар берди AFP 12 январ, жума куни Дания полициясига таяниб. Унга кўра, бу ҳақда Шарқий Дания Олий судида ушбу иш бўйича ёпиқ суд мажлисида сўзга чиққан прокурор Андерс Ларссон айтди.

Ўтган йилнинг 14 декабр куни Дания Хавфсизлик ва разведка хизмати (PET) вакили Флемминг Дрейер полиция мамлакатнинг турли ҳудудларида ўтказилган рейдлар чоғида терактни режалаштиришда гумон қилинган уч кишини қўлга олганини маълум қилди. У ушланганларнинг шахси ва ҳужумнинг эҳтимолий нишони ҳақида ҳеч қандай маълумот бермади.

Дания адлия вазири: «Хавф жиддий»

Исроил бош вазири Бинямин Нетаняҳу шу куни Дания хавфсизлик кучлари «Европа заминида бегуноҳ тинч аҳолини ўлдиришга қаратилган ҳужумни бартараф этганини» айтди.

Ҳозирда ушбу ишда жами етти нафар гумонланувчи иштирок этмоқда. Дания адлия вазири Питер Хуммелгорд жума куни уларнинг ҲАМАС билан алоқалари «Данияга таҳдид жиддий эканлигини тасдиқлайди», деди. «Аммо бизни ҳар куни ҳимоялаш учун қўлидан келган ишни қиладиган кучли полиция ва разведка хизматларимиз бор», деди у.