Полшада виза можароси: ташқи ишлар вазири собиқ ўринбосари қўлга олинди

Полшада коррупцияда гумонланаётган Полша ташқи ишлар вазирининг собиқ ўринбосари Пётр Вавжик қўлга олинди. 17 январ, чоршанба куни Полшанинг Коррупцияга қарши курашиш марказий бюроси аниқлик киритишича, «Қонун ва адолат» партияси аъзоси бўлган дипломат «визалар бериш масаласи тез кўриб чиқилгани учун пул мукофоти олгани» бўйича тергов қилинмоқда. 

2019 йилдан Пётр Вавжик Полша ташқи ишлар вазирлигида консуллик масалалари учун масъул бўлиб келган. 2023 йил август ойида у тўсатдан бу лавозимдан четлатилди. Шу билан бирга, Коррупцияга қарши бюро у раҳбарлик қилган бўлимда тинтув ўтказди.

Осиё ва Африкадан келган муҳожирларга Полша визалари ноқонуний берилиши

Полша оммавий ахборот воситалари ёзишича, Вавжик воситачи компаниялар Полшага расмий тартибни четлаб ўтиб, катта миқдордаги пул эвазига виза олишни хоҳловчиларга таклиф қилган схемада иштирок этган. Натижада Осиё ва Африка давлатларидан келган муҳожирлар Шенген келишувида иштирок этувчи давлатлар, жумладан, Германия ҳудудига ноқонуний равишда киришга муваффақ бўлди. Таъкидланишича, бундай мижозлар орасида кўп марталик визалар айниқса талабга эга. 

Полша прокуратураси аввалроқ хабар берганидек, ушбу иш юзасидан етти нафар шахсга нисбатан тергов ҳаракатлари олиб борилмоқда. Шу билан бирга, Полшанинг қатор араб давлатлари, шунингдек, Филиппин, Сингапур, Ҳонгконг ва Тайвандаги консулликларида бир неча юзлаб меҳнат визалари берилиши билан боғлиқ ҳолатлар ўрганилмоқда. Айни пайтда, Европа кенгаши собиқ раҳбари Доналд Тускнинг «Фуқаролик платформаси» партияси визаларни суиистеъмол қилиш кўлами аслида анча катта эканлигини даъво қилмоқда.

Полшадаги виза можаросида Пётр Вавжикнинг роли 

Украинанинг «Европа ҳақиқати» онлайн-нашрига кўра, Пётр Вавжик шахсан консулларга маълум бир гуруҳ одамларга виза беришни буюрган, бу эса қоидабузарликдир. Агар Покистон ёки Бангладеш каби давлатлардан келганлар ҳақида гапирилса, бундай хизмат учун мигрантлар тахминан 4000-5000 АҚШ доллари ва ундан кўп пул тўлаши керак бўлган.

Полшадаги виза можароси 2023 йил сентябрида маълум бўлган эди. 15 сентябр куни Полша ташқи ишлар вазирлиги визалар олишда воситачи компаниялар билан тузилган барча шартномаларни тўхтатаётганини маълум қилди. Бундан ташқари, мамлакатдаги барча консуллик муассасаларида текширувлар эълон қилинди. 

Полша ташқи ишлар вазирлигидаги ҳуқуқбузарликлар ҳақидаги хабарлар айниқса кучли резонансга эга бўлди, чунки Вавжикнинг ҳаракатлари Полшада миграция сиёсатини кучайтиришни талаб қилаётган партияси расмий позициясига зид.