Қизил денгиздаги ҳарбий операция савдо кемаларини Ямандан ҳусийчилар ҳужумидан ҳимоя қилишни таъминлаши керак, деди Европа дипломатияси раҳбари Жозеп Боррел.
Европа Иттифоқи давлатлари Қизил денгизда тижорий юк ташиш хавфсизлигини таъминлаш учун ҳарбий операция ўтказиш зарурлиги тўғрисида принципиал келишувга эришди. Бу ҳақда 22 январ, душанба куни ЕИ ташқи ишлар вазирларининг Брюсселдаги йиғилиши якунида Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел маълум қилди. Унинг сўзларига кўра, Европа Иттифоқи давлатлари ҳозиргача «ушбу миссиянинг турли вариантларини муҳокама қилган», унинг мақсади кемаларни Ямандан ҳусийчиларнинг ҳужумларидан ҳимоя қилишдир. Идеал ҳолда, операция феврал ойида бошланиши керак, деди Боррел. Бошқа тафсилотлар келтирилмаган.
Ҳусийчилар Қизил денгиздаги кемаларга ҳужум қилмоқда
Исроил ва ҲАМАС ўртасидаги уруш фонида Яманнинг ҳусийчи исёнчилари 2023 йил октябр ойи бошидан бери Қизил денгиздаги тижорат ва ҳарбий кемаларга ҳужум қилмоқда. Ҳусийчилар Ғазодаги урушга ҲАМАС тарафида кирганини эълон қилди.
2024 йил 12 январга ўтар кечаси АҚШ ва Британия Нидерландия, Канада, Австралия ва Баҳрайн кўмагида Ямандаги ҳусийчилар нишонларига йирик зарбалар берди. АҚШ президенти Жо Байден бу ҳусийчиларнинг Қизил денгиздаги хорижий юк кемаларига «мисли кўрилмаган» ҳужумларига тўғридан тўғри жавоб эканлигини айтди. Ўшандан бери ҳусийчиларнинг позицияларига ҳужумлар давом этмоқда.
Январ ойи бошида Боррел Европа Иттифоқи мамлакатларига Қизил денгизда махсус Европа денгиз миссиясини яратиш бўйича таклиф юборганини маълум қилди. Financial Times ёзганидек, Германия, Франция ва Италия Европа Иттифоқининг иложи борича кўпроқ давлатларини навигация хавфсизлигини таъминлаш учун Қизил денгизга денгиз кучлари ёки шахсий таркибни юборишда иштирок этишга чақирди.
