Самарқанд ва Тошкентда фуқароларни катта пул эвазига АҚШ, Франция ва Канада давлатларига юборишни ваъда қилган шахслар ушланди

Уларга нисбатан Жиноят кодексининг бир қатор моддалари билан жиноят ишлари қўзғатилган.

Фото: Бош прокуратура ҳузуридаги департамент

Бош прокуратура ҳузуридаги депатаментнинг хабар беришича, департамент ва ДХХнинг ҳудудий бўлимлари томонидан бир нечта ҳолатда фуқароларни катта пул эвазига АҚШ, Франция ва Канадага юбормоқчи бўлган шахслар ушланган.

Жумладан, департаментнинг Чилонзор туман бўлими ва ДХХ ходимлари ўтказган тезкор тадбирда фуқаролар К.С., М.О. ва О.З. фуқаро Ш.Ш.нинг ишончига кириб, уни танишлари ёрдамида Европа орқали АҚШга юбориши ҳамда виза ҳужжатларини расмийлаштириб бериши эвазига 32 000 доллар олган вақтда ашёвий далиллар билан ушланган.

Шунингдек, терговга қадар текширувда фуқаро О.З. фуқаро Ш.Ф. ва унинг оила аъзоларини Францияга боришлари учун виза ҳужжатларини олиб бериш эвазига 3 900 долларни фирибгарлик йўли билан ўзининг виза картасига ўтказиб олгани аниқланган.

Департамент ҳамда ДХХ Оқдарё тумани бўлимлари томонидан ўтказилган тезкор тадбирда фуқаролар Ҳ.А. Г.М. ва Ж.А. фуқаро Р.М.нинг ишончига кириб, уни танишлари ёрдамида 7 000 доллар эвазига Канадага ишга юборишини айтиб, олдиндан 1 500 доллар ва 600 минг сўмни олган вақтида ашёвий далиллар билан ушланган.

Қайд этилишича, мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.