Россияда «вагнерчилар» жанговар ҳаракатлар фахрийлари мақомини олади

Россиянинг Украинага қарши урушида РФ мудофаа вазирлиги билан шартнома тузмаган иштирокчилар жанговар фахрийлар учун мўлжалланган нафақа ва бошқа давлат ёрдамини олади. Кремл сайтида 25 январ куни эълон қилинган ҳужжатга кўра, президент Владимир Путин Россия ҳукуматига 1 апрелгача қонунчиликка тегишли ўзгартиришлар киритишни топширди. 

«Россия Федерацияси меъёрий-ҳуқуқий ҳужжатларига ҳарбий ҳаракатларда қатнашган шахсларга махсус ҳарбий операция пайтида жароҳат ёки касаллик олганини тасдиқловчи ҳужжатлар асосида жанговар фахрий мақомини беришни назарда тутувчи ўзгартиришлар киритилсин», - деб кўрсатилган буйруқда. 

«Вагнер» ХҲК ёлланма аскарлари 

Россиянинг Украинага қарши деярли икки йилдан бери давом этаётган уруши пайтида «Вагнер» ХҲКнинг кўплаб ёлланма аскарлари мудофаа вазирлиги билан шартнома имзоламаган. 14 декабр куни «тўғридан тўғри мулоқот» пайтида собиқ «вагнерчилар»дан бири президентга ХҲК иштирокчилари томонидан фахрий мақомини олиш имконияти ҳақида савол берди. Путин «вагнерчилар» бошқа барча жанговар ҳаракатлар иштирокчилари каби имтиёзлар ва давлат томонидан қўллаб-қувватланиш ҳуқуқига эга эканини айтди. 

Кўплаб қариндошлари 2023 йилнинг ёзида VK ижтимоий тармоғида «Защитники отечества» давлат жамғармаси гуруҳи изоҳларида «Вагнер» ХҲКнинг кўплаб ёлланма аскарларига жанговар фахрий гувоҳномалари берилмаётгани ҳақида шикоят қила бошлади. Ушбу ҳужжатсиз жангчилар давлат томонидан имтиёзлар ва қўллаб-қувватлаш, жумладан, комплекс тиббий, психологик ва ижтимоий реабилитация, санаторий-курортда даволаниш ва юридик ёрдам олиш ҳуқуқига эга эмас.