Лондонда «Вагнер» ХҲК билан ҳамкорлик қилган британияликларга ҳукм ўқилди

Лондон суди 20–23 ёшдаги олти британияликни пойтахтнинг шарқида, Украинага етказиб бериладиган ускуналар сақланган омборни «Вагнер» ХҲК топшириғи асосида ёқиб юборгани учун 7 йилдан 17 йилгача озодликдан маҳрум этди. Тегишли баёнот жума, 24 октябр куни Қироллик прокуратура хизмати (CPS) сайтида эълон қилинди.

Терговга кўра, 21 ёшли Дилан Эрл, олдин турли моддалар тарқатиш билан шуғулланган, 2023 йилда Telegram орқали Британияда террористик ташкилот деб топилган Россиянинг «Вагнер» хусусий ҳарбий ташкилоти билан боғланган.

Шундан сўнг Эрл аввал таниш бўлмаган 23 ёшли Жейк Ривзни жалб этган, Ривз эса ўз навбатида 23 ёшли Нии Менсах ва Жаким Роуз, шунингдек 21 ёшли Угниюс Асменани қўшган. Ривз аввалига ўт қўйиш «Вагнер» топшириғи эканини билмаган. У Менсах, Роуз ва Асмена билан бирга 2024 йил 20 март куни Лондоннинг шарқидаги Лейтон туманида омборда икки объектни ёққан, Менсах эса воқеани FaceTime орқали Эрлга жонли кўрсатган.

Ёнғинни ўчиришга 60 нафар ўт ўчирувчи жалб этилган. Зарар қарийб 1,5 млн еврони ташкил этган. Шунга қарамай, «Вагнер» натижадан мамнун бўлмаган ва ваъда қилинган 10,3 минг еврони гуруҳга тўлашдан бош тортган. Пулни қўлга киритиш учун жиноятчилар Лондонда ресторан бизнеси билан шуғулланиб, РФ ҳокимиятини очиқ танқид қиладиган россиялик собиқ тадбиркор Евгений Чичваркинни ўғирлашга рози бўлган. Signal мессенжерида муҳокама қилинган режалар орасида унинг дўкони ва ресторанини ёқиб юбориш ҳам бор эди. Бироқ пойтахт полицияси бу содир этилгунча гумонланувчиларни қўлга олган.

Энг қаттиқ жазо Эрлга тайинланди — у 17 йилга озодликдан маҳрум этилди ва қўшимча 6 йиллик назорат (пробация) муддати белгиланди. Ривз — 12 йил, Менсах — 9 йил, Роуз — 8 йил, Асмена — 7 йил озодликдан маҳрум этилди, уларнинг ҳар бирига қўшимча 1 йилдан назорат муддати тайинланди. Шунингдек, 20 ёшли Эштон Эванс Чичваркинни ўғирлаш режаси ҳақида билгани ҳолда полицияга хабар бермагани учун 9 йилга ҳукм қилинди.

Эрл ва Ривзга чиқарилган ҳукмлар 2023 йилда қабул қилинган Миллий хавфсизлик тўғрисидаги қонун бузилиши учун қўлланган илк қарорлар бўлди. Мазкур қонун бошқа давлатлар топшириғи билан амалга оширилган жосуслик, диверсия ва шу каби жиноятлар учун қаттиқ жазоларни назарда тутади.