Тошкентда рейд: ноқонуний қурилишлар ва қоидабузарликлар бўйича чоралар кўрилди

Ўрганиш ишлари дастлаб Юнусобод тумани Посира маҳалласи ҳудудида қурилаётган савдо ва маиший хизмат кўрсатиш объектидан бошланди.

Маълум бўлишича, M.Xўжаҳмедов томонидан барпо этилаётган савдо-маиший хизмат кўрсатиш биносининг қурилиш-монтаж ишлари Тошкент шаҳар Қурилиш ва уй-жой коммунал хўжалигининг ҳудудий назорат қилиш инспекцияси томонидан рўйхатдан ўтмасдан туриб бошланган.

Инспекция мутахассислари томонидан объект тегишли тартибда рўйхатдан ўтгунга қадар қурилиш-монтаж ишларини тўхтатиш бўйича ёзма кўрсатма берилган. Шунингдек, МЖтКнинг 99-моддасига асосан маъмурий баённома расмийлаштириш ишлари олиб бориляпти.

Кейинги манзил – Юнусобод тумани 9-мавзеда “Zo'rsan Residence Developer” МЧЖ томонидан қурилаётган кўп қаватли турар-жой объекти бўлди.

Мониторинг тадбирлари давомида қурилиш ва уй-жой коммунал хўжалиги вазири ўринбосари Тоир Алиматов аниқланган бир қанча камчиликларга тўхталиб ўтди:

“1500 хонадондан иборат 16 қаватли турар-жой объектида олиб борилаётган ҳандақ-котлован ишларида техника хавфсизлиги чоралари кўрилмаган. Яъни, ҳандақ атрофи 1.10 метр баланликдаги ҳимоя тўсиқлари билан ўралмаган. Ҳудуд атрофида тозалаш тадбирлари олиб борилмаган. Хавфли ҳудудлар олдида тегишли белгилар ўрнатилмаган”, – дейди у.

Қурилиш-пудрат ташкилоти масъулларига мавжуд камчиликларни бартараф этиш юзасидан кўрсатмалар берилди.

Рейд тадбирлари Чилонзор тумани Чўпонота кўчаси 14-уй манзилида “Leader House Building” МЧЖ томонидан қурилаётган объектни ўрганиш ишлари билан давом этди.

Маълум бўлишича, мавжуд савдо дўкони биносини ертўла қисмида автотураргоҳ ташкил қилиш шарти билан 1-2-қаватлари савдо ва маиший хизмат кўрсатиш мажмуаси бўлган ўрта қаватли турар-жой биносига қайта ихтисослаштириб, реконструкция қилиш объектининг қурилиш-монтаж ишлари ҳудудий назорат қилиш инспекциясидан тегишли тартибда рўйхатдан ўтмасдан туриб амалга оширилган.

Инспекция томонидан қурилиш ишларига маъсул раҳбар ўринбосарига нисбатан Вазирлар Маҳкамасининг 2020 йил 20 августдаги 496-сонли қарори билан белгиланган талаб асосида ёзма кўрсатма расмийлаштирилган ҳамда кўрсатма талабларини ўз вақтида бажармагани учун МЖтКнинг 99-моддаси 7-қисми бўйича 2022 йил 3 ноябрда маъмурий жазо қўлланилган.

Шунга қарамай “Leader House Building” МЧЖ томонидан яна қурилиш ишлари олиб борилаётгани аниқланган ҳамда инспекция томонидан 2023 йилнинг 2 февралида 309-сонли ёзма кўрсатма расмийлаштирилган. Кўрсатма талабларини ўз вақтида бажармагани учун 2023 йил 30 мартда МЧЖ раҳбар ўринбосарига нисбатан МЖтКнинг 99-моддаси 7-қисми бўйича маъмурий жазо қўлланилган.

“Тошкент шаҳар Қурилиш ва уй-жой коммунал хўжалигининг ҳудудий назорат қилиш инспекцияси томонидан қўйилган талабларни бажармасдан ШНҚ (шаҳарсозлари нормалари ва қоидалари) ва ҚМҚ (Қурилиш меъёрлари ва қоидалари) талабларини қўпол равишда бузган ҳолда қурилиш-монтаж ишларини давом эттираётган ушбу МЧЖ маъсул раҳбарларига нисбатан Тошкент туманлараро Иқтисодий судига даъво аризаси киритилган”, – дейди инспекция мутахассиси Шаҳзод Сапарбоев.