Зеленский украин армиясидаги кенг кўламли ўзгаришларни якунлади

8 феврал куни Украина президенти Володимир Зеленский Украина қуролли кучлари бош қўмондони Валерий Залужнийни истеъфога чиқарди ва шундан кейин мамлакат ҳарбий қўмондонлигини тўлиқ алмаштирди. Олександр Сирский янги бош қўмондонга айланди, Украина Бош штабига эса Анатолий Баргилевич раҳбарлик қиладиган бўлди. «Украинская правда» Украина қуролли кучларининг янги раҳбарияти ҳақида батафсил маълумот берди. Қуйида ушбу материалнинг асосий жойлари келтирилади.

Анатолий Баргилевич — Украина ҚК Бош штаби бошлиғи

Баргилевич Житомир области Омеляновка қишлоғидан. У  олий умумқўшин қўмондонлик билим юртини тамомлаган, кейин Украина Миллий мудофаа университетида ўқиган. Ҳозирда 54 ёшда бўлган Баргилевич бунгача Украина ҚК Ҳудудий мудофаа кучлари қўмондони эди. 

2014 йилда, Украина шарқида уруш бошланганида, у Бош штаб Бош оператив бошқармаси бошлиғи лавозимини эгаллайди. Икки йил ўтиб Украина қуруқлик қўшинлари қўмондони ўринбосарига айланади, бу лавозимда ўша вақтда ҳали қўшинларнинг алоҳида ҳарбий тури бўлмаган ҳудудий мудофаани ривожлантириш билан шуғулланади. 

2022 йилда Баргилевич фронтнинг шарқий участкасига масъул бўлган «Хортица» оператив-стратегик қўшинлар гуруҳи штаби бошлиғи бўлади. Бу гуруҳ қўмондони Олександр Сирский эди. Баргилевич бу лавозимда қарийб бир ярим йил ишлайди, кейин эса Ҳудудий мудофаа кучлари қўмондони этиб тайинланади. 

«Украинская правда»нинг қайд этишича, Баргилевич ҳудудий мудофаа кучларига қайтишидан олдинроқ кенг кўламли босқин бошида муҳим роллардан бирини бажарганига қарамай, қўшинларнинг бу турини Қуруқлик қўшинлари таркибига қўшишни исташаётгани ҳақида маълумот пайдо бўлганди. Баргилевич келгач эса бу ҳақида тез-тез гапира бошлашади. «УП» маълумотига кўра, у қўшинларнинг ушбу турини «заифлаштириш» билан машғул бўлган. Хусусан, Ҳудудий мудофаа кучларининг энг муваффақиятли лойиҳаси — НАТО стандартлари бўйича ишлаб чиқилган ҳарбий хизматчиларни ўқитиш дастури — Баргилевич келгач Шевченко номидаги Киев Миллий университети ҳарбий институти раҳбарлигига ўтказилади. Шунингдек, ҳудудий мудофаа кучлари учун маблағ излаб топиш билан шуғулланган жамоа тарқатиб юборилади. Жамғармалар ва ҳудудий мудофаа кучлари кўнгиллиларининг ҳамкорлиги туфайли техника, қурол ва ўқитиш учун пул топишнинг имкони бўлганди, дея қайд этади «УП». Бундан ташқари, март ойи охиригача сўнгги вақтларда сафлари янги одамлар билан тўлдирилмаётган ҳудудий мудофаа кучларининг бир қанча бригадаларини бошқа қўшинлар таркибига ўтказишни якунлаш режалаштирилган. 

Баргилевичнинг ўзи Ҳудудий мудофаа кучларини ривожлантиришни давом эттириш зарурлиги ҳақида гапириб, бу қўшин вазифаларини қайта кўриб чиқиш кераклигини таъкидлайди.

Олександр Павлюк — Қуруқлик қўшинлари қўмондони

Қуруқлик қўшинларига шу вақтга қадар Олександр Сирский қўмондонлик қилиб келаётганди. Бу қўшин раҳбари бўйсунувида 600 мингга яқин ҳарбий хизматчи бор, «Украинска правда» шунинг учун ҳам бу лавозимни «Сирскийнинг атрофидаги кишилардан бири эгаллаши»ни тахмин қилганди. Нашрнинг қайд этишича, 53 ёшли Павлюк айнан шундай кишилардан бўлган. Ҳарбийни ушбу лавозимга тақдим қиларкан, Сирский унда бу лавозим учун бошқа номзод бўлмаганини айтган.

Павлюк ҳарбий фаолиятини 1991 йилда, Харкив гвардия олий танк қўмондонлик-муҳандислик билим юртини тамомлаганидан кейин бошлаган. 2006-2007 йилларда у Косовода украин тинчликпарвар кучларига раҳбарлик қилади. 2010 йилдан 2015 йилга қадар Павлюк Лвив областидаги 24-алоҳида механизациялашган бригадасини бошқаради. 2014 йил мартидан у Словянск, Лиман, Краматорск, Лисичанск ва Донбассдаги бошқа шаҳарлар учун жангларда қатнашган. Кейин Павлюк Қуруқлик қўшинларининг «Запад» оператив қўмондонлик қўшини қўмондони, Қуруқлик қўшинлари қўмондонлиги тайёргарлик бўлими бошлиғи ва Бирлашган кучлар операциялари қўмондони лавозимларида хизмат қилади. 

Кенг кўламли босқин бошланишига бир ой вақт қолганида Павлюк The Times нашрига интервюсида Россия қўшини ҳужуми Донбасс билан чекланмаслиги мумкинлигини айтганди. 2022 йил мартида Павлюкни Бирлашган кучлар операциялари қўмондони лавозимидан олиб, Киев области ҳарбий маъмурияти раҳбари этиб тайинлашади. У Украина пойтахти мудофаасини ташкиллаштириш ва таъминлаш учун масъул бўлади. «УП»нинг област ҳарбий маъмуриятидаги манбаси унинг «ижобий хислатлари»ни келтирган. Павлюк 2022 йил майига қадар маъмуриятга раҳбарлик қилади. 2023 йил февралида у Украина мудофаа вазирининг биринчи ўринбосари бўлади.

Игор Скибюк — Десант-штурм қўшинлари қўмондони

48 ёшли Скибюк — Сирский жамоасидаги энг кам кўзга ташланган ҳарбий хизматчилардан биридир. У Десант-штурм қўшинларининг 80-Галиция бригадасида хизмат қилган, бу бригада «2022 йил 24 февралдан олдинги урушнинг деярли барча нуқталарини босиб ўтган» — 2014 йил апрелида Словянск учун жанглардан тортиб Авдийивкадаги Луҳанск аэропорти учун бўлган жангларгача (2017 йил). 

Скибюк қўмондонлигида бригада кенг кўламли босқин бошида Россия қўшинларини Херсон йўналишида тўхтатиб туришга уринган, аммо кучлар тенг эмасди, дея қайд этади «УП». Кейинроқ бригада Харкив областини озод этишда иштирок этади. Бунинг учун Скибюк Украина Қаҳрамони унвонини олади. Фронтда Скибюк билан йўллари кесишган ҳарбийлар уни ҳеч қачон шахсий таркибга бақирмайдиган, «вазмин, хотиржам» раҳбар сифатида таърифлашган. 

Юрий Содол — Бирлашган кучлар қўмондони

Янги тайинловга қадар Украина Денгиз пиёдалари корпуси қўмондони бўлган. Содол ҳарбий хизматни артиллериячи сифатида бошлаган, кейин десантчи бўлган ва шундан кейингина денгиз пиёдасига айланган. У 12 йил 25-ҳаво-десант бригадасида хизмат қилган, шундан икки йилини аксилтеррор амалиётларда (АТО) ўтказган. 2015 йилда Содол десант--штурм қўшинлари қўмондонлигига келган, 2018 йил мартида Денгиз пиёдалари корпуси қўмондонига айланган. 

Журналистлар Содолни «ҳар бир командирнинг оҳангини ўз кўзи билан кўриш ва қулоғи билан эшитиш» учун имкон қадар кўпроқ вақт тўқнашув чизиғида бўлишга интиладиган қўмондон сифатида тасвирлайди. «Украинская правда»нинг тасдиқлашича, денгиз пиёдалари РФнинг кенг кўламли босқинидан бир неча йил олдинроқ Украинанинг элита қўшинига айланганди.

Игор Плахута — Ҳудудий мудофаа кучлари қўмондони

«УП» Плахутанинг тайинловини «энг жумбоқли ва баҳслиси» деб атаган. Унинг оммага маълум биографияси фақат 2005 йилдан, Алоҳида президент бригадаси командири бўлганидан бошланади, 2009 йилда у Қуруқлик қўшинларининг 169-«Десна» ўқув маркази бошлиғига айланади. 

Журналистлар у ўн йил муқаддам, Киевдаги Евромайданни тарқатиш чоғида Игор Плахута Украина ИИВ ички қўшинларини бошқарганига эътибор қаратишган. 2013 йил 10 декабр куни кечаси ҳуқуқ-тартибот органлари Киевдаги ҳукумат кварталини намойишчилар ўрнатган баррикадалардан тозалайди. Ўша вақтда ИИВ ички қўшинлари Жанубий ҳудудий қўмондонлиги бошқармаси бошлиғи лавозимида бўлган Плахута ОАВга берган интервюсида кўчани тозалаш учун ички қўшинлардан 400 га яқин жангчи ва «Беркут» махсус отряди жалб қилинганини айтган. У шунингдек «баррикадаларни олиб ташлаш билан шуғулланаётган қора кийимли кишилар коммунал хизмат ходимлари» эканини айтган.

Бундан ташқари, у 2014 йил январида ИИВ номидан митингчилар билан музокара олиб борган. Ўша воқеаларнинг айрим иштирокчилари «УП» мухбири билан суҳбатда Плахута намойишчилар билан музокара олиб борган кам сонли командирлардан бири бўлганини айтишган.

Ҳарбий хизматчи Максим Громов фейсбукдаги саҳифасида Платуха билан «уруш вақтида учрашгани»ни айтган ва уни «иш одами» деб атаган.

Ўз навбатида ҳудудий мудофаа қўшинларидагилар янги қўмондон ҳарбийларни бошқа қўмондонлик бўйсунувига ўтказиб, қўшинни «тозалаш»ни давом эттиради, деб ҳисобламоқда.

Вадим Сухаревский — Украина қуролли кучлари бош қўмондонининг дронлар бўйича ўринбосари

39 ёшли Сухаревскийни Украина қуролли кучларининг Донбассдаги айирмачиларга ўт очишга буйруқ берган илк зобити деб аташади. Бу 2014 йил апрелида Словянск яқинида рўй берган, ўшанда 80-алоҳида десант-штурмов бригадаси катта лейтенанти бўлган Сухаревский Украина хавфсизлик хизматининг «Алфа» махсус бўлинмасига ҳужум қилган Игор Стрелков (Гиркин) отрядига ўт очган. 

2016-2021 йилларда Сухаревский 503-денгиз-пиёдалар баталёни командири бўлган. 2022 йил февралидан у Миколайив мудофаасида ва Херсон областидаги қарши ҳужумда қатнашган 59-алоҳида мотопиёдалар бригадасини бошқарган. Сухаревский учувчисиз учар аппаратлар ҳозирги урушда «жуда катта» рол ўйнайди деб ҳисоблайди. Унинг буйруғи билан 59-бригадада FPV-дронларни ишлаб чиқариш ва таъмирлаш ташкил этилган.

Андрей Лебеденко — Украина ҚК бош қўмондонининг инновациялар, армиянинг технологик компонентлари ва жанговар тизимлар бўйича ўринбосари

«Украинская правда» Лебеденкони Сирский жамоасидаги «қора тойчоқ» деб атаган. Интернетда полковникнинг ҳарбий тажрибаси тўғрисида маълумотлар йўқ. 2022 йил сентябрида у «Украина давлат суверенитети ва ҳудудий яхлитлигини ҳимоя қилишда кўрсатган шахсий жасорати ва фидокорона ҳаракатлари учун» Даниил Галицкий ордени кавалери сифатида тақдирланган. 

Володимир Горбатюк, Олексий Шевченко ва Михайло Драпатий — Украина ҚК Бош штаби бошлиғи ўринбосарлари

Михайло Драпатий урушда 2014 йилдан бошлаб иштирок этиб келади.

Ўша вақтда у 72-алоҳида механизациялашган бригаданинг 2-механизациялашган баталёни командири бўлган. У Мариупол милиция бўлинмасида айирмачилар томонидан гаровда ушлаб турилганларни озод этиш амалиётига бошчилик қилган. Украин нашрлари ёзишича, машҳур видеодаги баррикадани ёриб ўтган БМП рулида шахсан Драпатийнинг ўзи бўлган.

У шунингдек Изваринский қуршовидан («Жанубий котёл» сифатида ҳам маълум) қўшинларни олиб чиқиш амалиётига раҳбарлик қилган, ўшанда 260 нафарга яқин украин ҳарбийси ва ўттиздан ортиқ техника қуршовда қолиб кетганди. 

2024 йил январига қадар Драпатий «Херсон» оператив гуруҳи қўмондони эди. Қўли остидагилар Драпатийни ҳамиша шахсий таркибни сақлаб қолишга қайғурадиган ва йўқотишларни камайтириш учун барча ишни қиладиган тажрибали зобит сифатида таърифлайди. Бош штабда у ҳарбийларни тайёрлаш ва шуғуллантириш жараёнига масъул бўлади.

Володимир Горбатюк 2014 йилда Косовода тинчлик ва хавфсизликни сақлаш бўйича вазифаларни бажарган украин бўлинмасига раҳбарлик қилган.

Кейинги йил у «Запад» оператив қўмондонлиги қўмондонининг биринчи ўринбосарига айланади. «УП» нашри ёзишича, бир йил муқаддам унинг фамилияси Запорижжя области ҳарбий маъмурияти раҳбарлиги учун номзодлар қаторида келтирилган. Горбатюкнинг Бош штабдаги йўналиши оператив иш, штаблар фаолияти, режалаштириш ва бошқариш бўлади.

Олексий Шевченко ҳақида ҳам кўп нарса маълум эмас.

У артиллериячи сифатида хизмат қилган, Лвивдаги Қуруқлик қўшинлари академияси бошлиғининг биринчи ўринбосари бўлган. 2022 йил апрелида Одессадаги ҳарбий академияни бошқарган — ўшанда уни бу лавозимга Олександр Сирский тақдим этганди. Ўша йил августида Шевченко бригада генерали унвонини олган. Бош штабда у логистика учун масъул бўлади.