Венгрия 26 февралда Швецияни НАТОга қабул қилиш масаласини кўриб чиқади

ФИДЕС партияси фракцияси раҳбари айтишича, Швециянинг НАТОга киришини ратификация қилиш бўйича овоз бериш қонунчилар таътилдан қайтган биринчи кунда бўлиб ўтади. Унга кўра, депутатлар Швеция аъзолигини қўллаб-қувватлаш ниятида.

Фото: Ludovic Marin/AFP/Getty Images

Венгрия парламенти Швециянинг НАТОга киришини ратификация қилиш бўйича 26 февралда, депутатлар таътилдан қайтганидан кейинги биринчи куни овоз беради. Бу ҳақда 20 феврал, сешанба куни «ФИДEС – Венгрия фуқаролик иттифоқи» ҳукмрон партиясининг парламентдаги фракцияси раҳбари Мате Кошич Facebook ижтимоий тармоғида маълум қилди. Унга кўра, ФИДЕС депутатлари Швециянинг НАТОга киришини қўллаб-қувватлаш ниятида.

Венгрия - Швеция аризасини ратификация қиладиган энг охирги давлат

Швеция 2022 йил 18 майда Финландия билан бир вақтда аъзолик учун ариза берган ва қўшилиш протоколлари 5 июлда имзоланган. 2023 йилнинг 4 апрелига қадар Швециянинг НАТОга кириши Туркия ва Венгриядан ташқари барча иштирокчи давлатлар томонидан ратификация қилинди. Жорий йилнинг 23 январида Туркия парламенти Швециянинг НАТОга киришини маъқуллади.

Венгрия бош вазири Виктор Орбан ўз ҳукумати Швециянинг НАТОга киришини қўллаб-қувватлашини бир неча бор таъкидлаган бўлса-да, 5 феврал куни бу масала кўриб чиқилиши керак бўлган парламент йиғилишини айнан ФИДЕС депутатлари бойкот қилган. Хусусан, улар Швеция бош вазири Улф Кристерссондан Венгрия демократиядан чекинаётгани ҳақидаги танқиди учун Будапештга ташриф буюришини талаб қилди. Бунга жавобан Кристерссон Будапешт билан Швеция аризаси бўйича кейинги барча музокараларни тўхтатаётганини, бироқ протокол ратификация қилинганидан кейин Орбан билан учрашишга тайёрлигини айтди.