Бербок РФни Украинадаги урушни зудлик билан тўхтатишга чақирди

Германия ташқи ишлар вазири Анналена Бербок Рио-де-Жанейродаги G20 ташқи ишлар вазирларининг йиғилишида Россия вакилини Украинадаги урушни тугатишга чақирди, деб хабар берди dpa 21 феврал, чоршанба куни. 

«Агар сиз инсонлар ҳаётини қадрласангиз, ўз халқингизни, россиялик болалар ва ёшларни қадрласангиз, бу урушни дарҳол тўхтатишингиз керак», деди Германия ташқи ишлар вазири ўзининг чап томонида икки ўриндиқ нарида ўтирган россиялик ҳамкасби Сергей Лавровга тўғридан тўғри мурожаат қилиб. «Агар Россия бу урушни ҳозир тўхтатса, эртага тинчлик ва адолатга йўл кенг очилади», деб қўшимча қилди Бербок. 

«Агар биз адолатли дунё қурмоқчи бўлсак, урушлар ва инқирозларга қарши биргаликда курашишимиз керак. Қатъийлик, ҳурмат ва ўз-ўзини англаш истаги билан», - деди федерал вазир давра суҳбатининг қолган иштирокчиларига мурожаат қилиб, у Украинадаги урушларни тугатиш тўғрисида турли нуқтайи назарларни ҳурмат қилишини таъкидлади.

Бербок Украинадан 10 000 километр узоқликда жойлашган Бразилия хавфсизликка таҳдидни Европа мамлакатларига қараганда бошқача қабул қилиши мумкинлигини тан олди, аммо шунга қарамай, Россия уруши «барчамизни ҳимоя қиладиган асосий тамойилларни: БМТ Низоми, халқаро ҳуқуқ ва инсон ҳуқуқларини қатъий ҳимоя қилишга чақиради». Ушбу тамойиллар сони ва яшаш жойидан қатъи назар, барча халқларни ҳимоя қилганлиги сабабли, «Россия тажовузкорлиги шунчаки минтақавий можародан кўра кўпроқ нарса», деб таъкидлади Германия ТИВ раҳбари. 

Бербок Исроилни ҳарбий ҳаракатларни тўхтатиб туришга чақирди

Исроилнинг Ғазо секторида ҲАМАС ҳаракатига қарши давом этаётган ҳарбий ҳаракатлари ва Ғазо сектори жанубидаги тинч аҳолининг азобланиши фонида Бербок «катта йигирматалик» ташқи ишлар вазирлари йиғилишида «барқарор ўт очишни тўхтатишга эришиш учун» гуманитар пауза қилишга чақирди.

«Бу можаро кўплаб мамлакатларимизда кучли ҳис-туйғуларга сабаб бўлди», деди Германия ташқи ишлар вазири. У ўз ҳамкасбларини «инсоният бўлинмас» эканлигини тан олишга чақирди, исроилликлар ва фаластинликларга бир-бирининг ёнида, «икки давлатда» тинч ва хавфсиз яшашига имкон берадиган ечим топилиши керак, дея қайд этади dpa. 

G20 таркибига иқтисодиёти энг ривожланган ёки ривожланаётган 19 давлат, шунингдек, Европа Иттифоқи ва Африка Иттифоқи киради. Ҳозирда Бразилия раислик қилаётган G20 бутун дунё иқтисодий қудратининг қарийб 80 фоизини ва сайёра аҳолисининг 60 фоизини ифодалайди. 

Путин Бербокни кескин танқид қилди

14 феврал куни Россия президенти Владимир Путин Анналена Бербокни нафақат Россияга, балки ўз давлатига ҳам душманликда айблади. Журналист Павел Зарубинга берган интервюсида Германия ҳукуматининг энергетика сиёсатини шарҳлар экан, Путин шундай деди: «Бундай даражадаги сиёсатчи ўз мамлакати, ўз халқининг иқтисодий манфаатларига шундай менсимаслик билан муносабатда бўлишини тасаввур қилиш қийин».

Россия Федерацияси президентининг сўзларига кўра, Германия Ташқи ишлар вазирлиги раҳбари аъзо бўлган «яшиллар» партияси «одамларнинг қўрқуви ва иқлим туфайли дунёда содир бўлиши мумкин бўлган воқеалар ҳақида бу қўрқувни қўзғатиш ҳақида спекуляция қилмоқда». «Кейин эса ўзлари қўзғатаётган бу қўрқувлар ҳақида спекуляция қилиб, улар ҳокимиятга келганидан узоқ бўлган сиёсий йўналишни давом эттирмоқда», деди Путин Германияда ҳозир «кўмир ишлаб чиқариш кўпайгани, яшил кун тартиби йўқ»лигини таъкидлаб.

Dpa агентлигининг таъкидлашича, Путин Бербокни танқид қилар экан, Россия Федерациясининг Украинага қарши уруши фонида Германия ҳукуматининг рус газига қарамликдан халос қилиш истагини назарда тутган. Анналена Бербок урушни кескин қоралайди ва Киевни кучли қўллаб-қувватлашни ёқлайди.