Ўзбошимчалик билан эгалланган ер участкалари ва уларда қурилган биноларга “амнистия” қонуни. Энг муҳим қоидалар қандай бўлади?

Қонун лойиҳаси Адлия вазирлигининг ташаббуси билан ишлаб чиқилган. Ҳозирда Олий Мажлис Қонунчилик палатасида кўриб чиқилмоқда.

Kun.uz Адлия вазирлиги жамоатчилик билан алоқалар бўлими билан боғланиб, қонун лойиҳасининг энг муҳим нуқталари ҳақида маълумот олди.

Лойиҳада нафақат фуқароларнинг уй-жойлари, балки тадбиркорларнинг ишлаб чиқариш объектлари ва улар жойлашган ерларга тегишли ҳуқуқлар эътироф этилиши таклиф қилинган.

Қонун таъсири доирасига 2018 йил 1 май кунига қадар ўзбошимчалик билан эгаллаган ер участкалари ҳамда унда қурилган бино ва иншоотлар тушади.

Қонун таъсири доирасига тушадиган объектлар космик суратлар орқали аниқланади.

Ўзбошимчалик билан эгаллаган ер ҳамда унда қурилган бино ва иншоотларга тегишли ҳуқуқ эътироф этилиши учун фуқаро ва тадбиркорларнинг ариза бериши талаб этилмайди. Расмийлаштириш жараёнлари ваколатли давлат органлари томонидан график асосида мустақил амалга оширилади.

Ҳуқуқни эътироф этишнинг асосий шартлари – ушбу ер бошқа шахсларга ажратилмаган ёки аукционга чиқарилмаган, фойдаланувчилар ўртасида низо ҳамда солиқдан қарзи бўлмаслиги керак.

Ҳуқуқ эътироф этилиши якунига етганда фуқаро ва тадбиркорларга бу ҳақида хабарнома юборилади.

Ҳуқуқлар эътироф этилганлик учун 370 минг сўмдан 3 млн 700 минг сўмгача бир марталик йиғим назарда тутилган.

Айрим тоифадаги объектлар бўйича қўшимча шартлар ҳам назарда тутилган.

Қонун лойиҳаси муҳокамаси давом этмоқда. Қонунчилик палатасининг ялпи мажлисига қачон киритилиши аниқ эмас.