Венгрия Швециядан янги қирувчи самолётлар сотиб олади

Венгрия Швециядан тўртта янги Jas 39 Gripen қирувчи самолётини сотиб олмоқда, бу ҳақда 23 феврал, жума куни Будапештда бош вазир Виктор Орбан швед ҳамкасби Улф Кристерссон билан қўшма матбуот анжуманида маълум қилди. Бундан ташқари, томонлар Венгрия 2006 йилдан бери Швециядан ижарага олган 14 та Gripen самолётига техник хизмат кўрсатиш ва логистика хизматлари бўйича келишувни узайтирди. 

Иккала сиёсатчи ҳам Венгрия ва Швеция келишиб олган масалалар бўйича яқинроқ ҳамкорлик қилиш муҳимлигини таъкидлади. «Биз иккимиз ҳам ЕИ аъзоларимиз ва тез орада НАТО иттифоқчиларига айланамиз», деди Улф Кристерссон. 

Венгрия пойтахтига ташрифи билан у Виктор Орбаннинг ўнг қанот популистик ФИДЕС партияси етакчи сиёсатчилари Будапешт томонидан Швециянинг НАТОга киришини маъқуллаш учун қўйган шартни бажарди. Венгрия парламенти душанба, 26 февралда, депутатлар таътилдан қайтганидан кейинги биринчи кун Швециянинг НАТОга киришини ратификация қилиш учун овоз бериши кутилмоқда.

Будапешт Швеция аризасини энг охирги бўлиб ратификация қилади

Швеция 2022 йил 18 майда Финландия билан бир вақтда аъзолик учун ариза берган ва қўшилиш протоколлари 5 июлда имзоланган. 2023 йилнинг 4 апрелига қадар Швециянинг НАТОга қўшилиши Туркия ва Венгриядан ташқари барча аъзо давлатлар томонидан ратификация қилинган эди. Жорий йилнинг 23 январида Туркия парламенти Швециянинг алянсга киришини маъқуллади.

Виктор Орбан ўз ҳукумати Швециянинг НАТОга киришини қўллаб-қувватлашини бир неча бор таъкидлаган бўлса-да, 5 феврал куни бу масала кўриб чиқилиши керак бўлган парламент йиғилишини айнан ФИДЕС депутатлари бойкот қилган. Хусусан, улар Швеция бош вазири Улф Кристерссоннинг Будапештга ташрифи билан Стокҳолм Венгрия демократиядан чекингани бўйича танқидига тузатиш киритишни талаб қилди.

Бунга жавобан Кристерссон Будапешт билан Швеция аризаси бўйича кейинги барча музокараларни тўхтатаётганини, бироқ протокол ратификация қилинганидан кейин Орбан билан учрашишга тайёрлигини айтди.