Украина Қора денгиздаги «дон йўлаги» орқали деярли 30 миллион тонна юк экспорт қилди, деди Володимир Зеленский. Киевда муқобил йўналишлар ҳам ишлаб чиқилмоқда - Дунай бўйлаб ва Молдова орқали, дея қўшимча қилди у.
Украина Қора денгиздаги «ғалла йўлаги» бўйлаб деярли 30 миллион тонна юк экспорт қилди, биргина 2024 йилнинг февралида бу кўрсаткич 8 миллион тоннани ташкил этди. Бу ҳақда 4 март, душанба куни бош вазир ўринбосари Андрей Кубраковнинг ҳисоботини эшитиб, президент Володимир Зеленский маълум қилди.
«Бундай уруш даврида бу жуда муҳим. Мен портларимизда, кемаларда ишлайдиган, денгиз йўлагининг ишлаши ва унинг хавфсизлигини таъминлаётган барчага миннатдорчилик билдираман», - деди Украина раҳбари. Telegram’даги постида у Украина раҳбарияти «муқобил йўналишларни (қишлоқ хўжалиги маҳсулотларини экспорт қилиш учун) – Дунай ва Молдова орқали ишлаб чиқишда давом этишини» қўшимча қилди.
6 феврал куни Украина бош вазири Денис Шмихалнинг маълум қилишича, олти ой давомида мамлакат Қора денгиз орқали деярли 20 миллион тонна юк экспорт қилган, шундан 70 фоизи украиналик фермерлар қишлоқ хўжалиги маҳсулотларидир. «Ана шу олти ой ичида 660 дан ортиқ юк кемалари 32 та давлатдаги манзилларга жўнаб кетди», — деб ёзди Шмигал Telegram’да. Унга кўра, 2024 йил январида денгиз орқали экспортнинг урушдан олдинги ойлик даражасига эришилган. Бу ойда 2,8 миллиард евро эквивалентидаги экспортнинг 60 фоизга яқини денгиз орқали амалга оширилди.
Россия «дон келишуви»дан чиққанидан кейин Украина янги денгиз йўлаги яратди
Россиянинг Украинага ҳужумидан сўнг, Россия Қора денгиз флоти Украина денгиз орқали экспортига тўсқинлик қилишга уринди. 2022 йил июлидан 2023 йил июлигача «дон келишуви» амалда бўлган - БМТ ва Туркия воситачилигида Украина қишлоқ хўжалиги маҳсулотларини экспорт қилишда Россия хавфсизлиги кафолатлари бўйича тузилган келишув. Бироқ, кейин Россия Федерацияси бу битимдан чиқди.
Шундан сўнг Киев Қора денгизнинг ғарбий қисмида янги хавфсиз денгиз йўлагини яратишга муваффақ бўлди. Бунгача Украина қуролли кучлари Змеиний оролини озод қилиб, Россиянинг бир қанча ҳарбий кемаларини, жумладан, Россия Қора денгиз флоти флагмани - «Москва» крейсерини чўктирган эди.
