АҚШ Сенати 1,2 триллион долларлик бюджет лойиҳасини кечикиб маъқуллади

Сенат қарори федерал ҳукумат фаолиятининг қисман тўхтаб қолишига йўл қўймади.

Фото: REUTERS

АҚШ Сенати федерал ҳукумат фаолиятининг қисман тўхтаб қолишига йўл қўймайдиган 1,2 триллион долларлик бюджет лойиҳасини кечикиб қабул қилди.

22 март куни АҚШ Вакиллар палатаси федерал агентликларнинг асосий қисмини молиялаштириш учун тахминан 1,2 триллион долларни 2024-молия йили охиригача ажратишни назарда тутадиган қонун лойиҳасини маъқуллади.

Демократлар палатаси аъзоларининг аксарияти қонун лойиҳасини қўллаб-қувватлади, аммо республикачиларнинг ярмидан кўпи унга қарши чиқди.

Шундан сўнг, қонун лойиҳаси Америка Конгрессининг юқори палатаси Сенатга тақдим этилди. «Шатдаун» юз бермаслиги учун Сенат ярим тунгача ҳужжатга овоз бериши керак эди. Бироқ 22 март куни қонун лойиҳаси бўйича овоз бериш ўтказилмади.

Олти департамент, жумладан Пентагон ва Давлат департаментини молиялаштириш 22 мартгача келишиб олиниши керак эди.

АҚШ Сенатида овоз бериш 23 март эрта тонгда бўлиб ўтди. Бюджет тўғрисидаги қонун лойиҳасини 74 киши ёқлади ва 24 киши қарши овоз берди. Натижада лойиҳа қабул қилинди.

Кейинги босқичда ҳужжат АҚШ президенти Жо Байден томонидан имзоланиши керак, бу ниҳоят ҳукумат томонидан молиялаштириш тақчиллигининг олдини олади.

АҚШ ҳукумати фаолиятининг тўхтатилиши - Конгресс ҳукумат фаолиятини молиялаштириш бўйича келиша олмаганида юзага келадиган вақтинчалик ҳолат.

Тўхтатиб туриш вақтида муҳим бўлмаган идоралар ёпилади ва уларнинг юз минглаб ходимлари ҳақ тўланмайдиган таътилга юборилади.

Америка қонунчилигига кўра, Конгресс ҳар йили 1 октябрда бошланиб, 30 сентябрда тугайдиган бутун молия йили учун бюджетни ўз вақтида тасдиқламаса, харажатлар вақтинчалик бюджетдан қопланади.

Федерал ҳукумат ушбу даврларда ўз маблағларини сарфлаш ваколатини йўқотади ва асосий хизматлардан ташқари барча фаолиятни тўхтатишга мажбур бўлади.

Конгресс янги бюджетни қабул қилмагунча, «муҳим» деб таснифланган ходимлар кўпинча маошсиз қолади.