2023 йилда Ўзбекистонга тўғридан-тўғри инвестициялар миқдори камайди

2023 йил давомида Ўзбекистонга молиявий оқим 6,6 млрд долларни ташкил этган. Бунда, тўғридан-тўғри инвестицияларнинг соф оқими 2,2 млрд долларни ташкил этиб, 2022 йилга нисбатан 16 фоизга ёки 425 млн долларга қисқарган. Бу ҳақда Марказий Банк маълумотларига таяниб Mirkonomika хабар берди.

Қайд қилинишича, сўнгги 5 йилда фақат пандемия кузатилган 2020 йилда тўғридан-тўғри инвестициялар оқимида қисқариш кузатилган эди. Ўшанда иқтисодий ўсиш 2 фоизгача секинлашган. 2023 йилда эса ўсиш 6 фоизни ташкил этиб, 2022 йилга нисбатан 0,3 фоизга тезлашган.

Ўз навбатида портфел инвестициялар ҳажми қарийб 1 млрд долларни ташкил этган. Бу октябр ойида чиқарилган 4,25 трлн сўм миқдоридаги «яшил» суверен халқаро облигациялар ҳамда 660 млн доллар миқдоридаги халқаро облигациялар билан изоҳланади.

Умуман олганда тўртинчи чоракда тўлов балансида молиявий оқимнинг юқори даражада ўсиши натижасида умумий оқим жорий операциялар ҳисоби дефицитига нисбатан 900 млн долларга кўпроқ бўлган, бу эса тўртинчи чоракда захиралар ҳажмининг қарийб 1,9 млрд долларга ошишига замин яратган. Аммо олдинги чораклардаги номутаносибликлар ҳисобига захиралар ҳажми 2023 йилда 2,7 млрд долларга қисқарган.

Таъкидланишича, давлатга тўғридан-тўғри инвестицияларнинг юқори суръатда сезиларли қисқариши келажак учун хавотирли сигнал сифатида қабул қилиниши керак.