Трамп штаби унинг Киевга босим ўтказиш режаларини рад этди

АҚШ собиқ президенти Доналд Трампнинг сайловолди штаби сиёсатчи агар у Оқ уйга қайтса, Украинани Қрим ва Донбассни Россияга беришга мажбурлаш ниятида эканини рад этди, бу ҳақда аввалроқ The Washington Post (WP) хабар қилган эди. Трампнинг сайловолди штабидаги маслаҳатчи Жейсон Миллер бу маълумотни «The Washington Post’нинг фейк хабари деб атади. «Улар буни шунчаки ўйлаб топди», деди у 7 апрелда чоп этилган New York Post газетасига берган интервюсида. 

У, шунингдек, Трамп Украинада «қотилликларни тўхтатиш ҳақида гапираётган ягона одам» эканини айтди. Бундан ташқари, Миллернинг таъкидлашича, АҚШ президентлигига қайтиши мумкин бўлмагунча, Трамп Украинадаги урушни тугатиш бўйича «тинчлик режаси» устида ишламайди. 

WP: Трамп Киевни Қрим ва Донбассни Россияга беришга мажбурламоқчи 

Шу куни The Washington Post газетаси Трампнинг режалари билан таниш манбаларига таяниб, АҚШ собиқ президенти Украина ҳукуматини Россияга ҳудудий ёнбосишга мажбур қилиб, урушни тугатиш нияти ҳақида ёзди. Бу масалани Оқ уйнинг собиқ раҳбари ёки унинг маслаҳатчилари билан муҳокама қилган нашр суҳбатдошларига кўра, таклиф Киевга Қрим ва Россияга қўшиб олинган Донбассни бериши учун босим ўтказишдан иборат. Бундай ёндашув Украинани ҳарбий қўллаб-қувватлаш ва Россия агрессиясига қаршилик кўрсатишга урғу берган АҚШнинг амалдаги президенти Жо Байден сиёсатига тубдан зиддир, дея қайд этади WP.

Трамп шахсий суҳбатда Россия ҳам, Украина ҳам мавжуд вазиятдан «ўз юзини сақлаб қолишни, чиқиш йўлини исташига» ишонишини ва Украинанинг баъзи ҳудудлари аҳолиси Россия бир қисми бўлишга қарши эмаслигини айтди, деди газетага собиқ президент билан суҳбатлашган шахс. 

Трампнинг айрим тарафдорлари уни бу ёндашувдан воз кечишга ишонтиришга ҳаракат қилди, чунки Украина бир қисми устидан Россия назоратини тан олиш Россия президенти Владимир Путин таъсир доирасини кенгайтиради, деб ёзади The Washington Post. 

Киев ҳар қандай ҳудудий имтиёзларни рад этади

2024 йилги президентлик сайловларида Республикачилар партиясининг асосий номзоди бўлган Трамп аввалроқ, агар сайланса, президентликка киришишдан олдин ҳам «24 соат ичида» Россия ва Украина ўртасида тинчлик келишуви бўйича музокара олиб бориши мумкинлиги ҳақида бир неча бор мақтанган эди. Бироқ, у буни қандай қилишни режалаштирганини очиқ айтишдан бош тортди. 

Украина ҳукумати Россияга ҳудудий имтиёзлар беришни истисно қилмоқда ва Оқ уй собиқ раҳбарига мамлакатга ташриф буюришни, шу жумладан фронт чизиғига боришни таклиф этди. Президент Володимир Зеленский Трампни муаммони 24 соат ичида ҳал қилиб бўлмаслигига ишонтириш учун 24 дақиқа етарли эканлигини айтди. У Америка собиқ президентига «аввал ўйлаб, кейин гапиришни» маслаҳат берди. Киев музокараларни бошлаш шарти сифатида 1991 йилги чегараларни тиклашни талаб қилмоқда.