Ноқонуний фойдаланиш ҳолатини бартараф этиб беришни ваъда қилган сув ва газ таъминоти ходимлари ушланди

Табиий ресурслардан ноқонуний фойдаланиш ҳолатларини бартараф қилиб беришни ваъда қилган шахслар ушланди.

Фото: Бош прокуратура ҳузуридаги департамент

Бош прокуратура ҳузуридаги департаментнинг Гулистон шаҳар бўлими томонидан тезкор тадбир ўтказилган.

Унда, “Сирдарё сув таъминоти” АЖ Гулистон шаҳар бўлими собиқ мутахассиси Ж.Ғ. фуқаро Ш.Д.нинг нотурар биносига ўрнатилган сув ҳисоблаш ускунаси носоз ҳолатда экани ва сувдан ноқонуний фойдаланганлиги бўйича далолатнома расмийлаштирмаслик эвазига фирибгарлик йўли билан ШД.дан 2,5 млн сўмни олган вақтида ашёвий далиллар билан ушланган.

Шу каби, департамент ҳамда ДХХнинг Андижон вилояти бошқармалари томонидан тезкор тадбир ўтказилган.

Унда, “Ҳудудгаз Андижон” газ таъминоти филиали Асака туман газ бўлими маҳаллада ишлаш хизмати бошлиғи А.У. фуқаро С.Ю.нинг хонадонида табиий газ таъминотидан 2,9 млн сўм қарздорлигини ўчириб, янги ҳисоблагич ўрнатиши ҳамда бошқа ҳисоб-рақам очиб бериши эвазига ўз хизмат хонасида 1,5 млн сўмни олган вақтида ушланган.

Департаментнинг Пахтаобод туман бўлими томонидан ДХХ ва ИИБ ходимлари билан ҳамкорликда тезкор тадбир ўтказилган.

Унда, Пахтаобод туман электр таъминотининг электромонтёри Ж.К. фуқаро М.Н.нинг ишончига кириб, унинг яшаш хонадонида электр энергиясидан ноқонуний фойдаланиб келаётгани бўйича далолатномаси расмийлаштирмаслик эвазига муқаддам 200 АҚШ доллари ва 3 млн сўмни фирибгарлик йўли билан қўлга киритиб, яна 600 минг сўмни олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.