Россияда мигрантларга тил сертификатини сотган институт ректори ишдан бўшатилди

Рус тили институти ходимлари мигрантларга ноқонуний равишда тил сертификатларини сотиш билан шуғулланган.

Наталя Трухановска / Фото: РИА Новости

Россия Таълим ва фан вазирлиги Пушкин номидаги Рус тили институти ректори Наталя Трухановская ишдан олинганини эълон қилди. Вазирлик унинг лавозимидан четлатилиши сабабини хорижликлар учун имтиҳонлар ўтказилиши устидан етарлича назорат ўрнатилмагани билан изоҳлади.

«Пушкин номидаги институтда ўтказилган текширишда рус тили, Россия тарихи ва қонунчилик асослари фанидан имтиҳон топшириш тартиби устидан нотўғри назорат ўрнатиш фактлари аниқланди», дейилади вазирлик хабарида.

Аввалроқ, 8 апрел куни Москвада беш киши, жумладан, Рус тили институти ходимлари ҳам қўлга олинган эди. Тергов маълумотларига кўра, улар мигрантларга ноқонуний равишда рус тили сертификатларини 5,9 минг рублдан сотишган.

Эслатиб ўтамиз, ушбу имтиҳонлар Россия ҳудудида чет эл фуқароларининг ижтимоий-маданий ва лингвистик мослашув механизмларидан биридир.