БАА сув тошқини оқибатларини бартараф этиш учун қарийб 550 млн доллар сарфлайди

БАА ҳукумати сўнгги ёмғирлар пайтида турар-жой биноларига етказилган зарарни қоплаш учун тахминан 544,6 миллион доллар (2 миллиард дирҳам) ажратишни маъқуллади. Бу ҳақда Дубай амири Муҳаммад бин Рашид Ол-Мактум маълум қилди. 

«Вазирлар қўмитасига жараённи назорат қилиш, уй-жойларга етказилган зарарни ҳисоблаб чиқиш ва маҳаллий ҳокимият органлари билан ҳамкорликда товон пулини тўлаш топширилди», деди у. 

Шайх Муҳаммаднинг айтишича, экстремал об-ҳаво «ўта жиддий бўлди» ва сув тошқини оқибатларидан сабоқ чиқариш лозим. Унинг сўзларига кўра, фавқулодда хизматлар кучли сув тошқини билан боғлиқ 200 мингдан ортиқ қўнғироқларни қабул қилган. 

16 апрел куни БААда сўнгги 75 йилдаги энг кучли ёғингарчилик кузатилди, айниқса Дубай бундан катта зарар кўрди. Сув тошқини оқибатида камида 3 киши ҳалок бўлди. 

Кучли ёғингарчилик туфайли асосий магистраллар ва Дубай аэропортидаги учиш-қўниш йўлаги сув остида қолди. Оқибатда 2 мингга яқин рейс кечиктирилган эди.