БАА мулкий тенгсизлик даражаси бўйича жаҳон рейтингида биринчи ўринни эгаллади

Бу ҳақда Швейцариянинг UBS банки томонидан тайёрланган йиллик Global Wealth Report 2026 ҳисоботида (.pdf) айтилади.

Тадқиқотда бойликнинг концентрация даражасини акс эттирувчи Жини коэффициентидан фойдаланилади: кўрсаткич қанчалик юқори бўлса, активларнинг шунчалик катта қисми аҳолининг кичик гуруҳи қўлида тўпланган бўлади.

Ҳисоботга кўра, 2025 йилда мулкий тенгсизлик даражаси энг юқори бўлган мамлакатлар рейтинги қуйидагича:

1. БАА - Жини коэффициенти 0,82;

2. Россия - 0,82;

3. ЖАР - 0,81;

4. Бразилия - 0,81;

5. Саудия Арабистони - 0,78;

6. АҚШ - 0,77;

7. Швеция - 0,74;

8. Ҳиндистон - 0,74;

9. Туркия - 0,73;

10. Мексика — 0,72.

Тадқиқот муаллифларининг таъкидлашича, Бирлашган Араб Амирликларининг юқори ўрни кўп сонли ўта бой резидентлар ва нисбатан кичик жамғармаларга эга меҳнат мигрантларининг салмоқли улуши билан изоҳланади. Бу эса бойликнинг чекланган доирадаги кишилар қўлида юқори даражада тўпланишига олиб келади.

Ҳисоботда банк 56 та бозорни таҳлил қилади, бироқ мулкий тенгсизлик рейтингида Ўзбекистон бўйича маълумотлар йўқ.

Шу билан бирга, экспертларнинг таъкидлашича, гап аҳоли даромадлари тенгсизлиги ҳақида эмас, балки айнан бойлик (активлар, кўчмас мулк, инвестициялар ва жамғармалар) тенгсизлиги ҳақида бормоқда. Бу кўрсаткичлар турли услуб бўйича ҳисобланади ва бир-бирининг ўрнини боса олмайди.