Россия зарбасидан кейин Украинада энергия таъминоти чекланди

Украинада 8 май, чоршанба куни Россия ракеталари ва учувчисиз учоқларининг бир кеча-кундузда уюштирган йирик ҳужумидан сўнг саноат ва бизнесни энергия билан таъминлаш чекланди. Бу ҳақда Украина энергетика тизимлари миллий оператори «Укрэнерго» ўзининг Telegram-каналида истеъмолчиларни огоҳлантирди. 

«Укрэнерго» диспетчерлик маркази саноат ва бизнесни соат 18:00 дан 23:00 гача электр энергияси билан таъминлашни чеклашга мажбур бўлди», - дейилади постда. Компания, шунингдек, агар кечқурун истеъмол ўсишда давом этса, у кескин чора кўриши кераклиги ҳақида огоҳлантирди - бутун Украина бўйлаб маиший истеъмолчилар учун электр энергияси фавқулодда узилади. Бунинг олдини олиш учун энергетиклар фуқароларни белгиланган соатларда электр энергиясидан эҳтиёткорлик билан фойдаланишга чақирди. 

Шу куни «Укрэнерго» раҳбари Владимир Кудрицкий «Украинска правда» газетасининг YouTube-каналида Европадан электр энергиясини импорт қилиш мамлакат энергетика тизимида юзага келган танқисликни тўлиқ қоплашга қодир эмаслигини айтди. «Кўплаб муҳим электр станциялари зарар кўрди - ДТЭКнинг учта электр станцияси (Украинадаги энг йирик хусусий энергия компанияси) ва иккита гидроэлектр станцияси, - дея тушунтирди у. - «Укрэнерго» объектлари, афсуски, доимий равишда душман нишонида. Аммо компания объектларига таъсир ҳозирда энергия тизими учун ҳал қилувчи омил эмас. Иссиқлик электр станциялари ва гидроэлектростанциялардаги кўп сонли энергия блокларига зарар етказилгани асосий масаладир». 

Кудрицкий Украинадаги энергетика объектларида таъмирлаш ишлари давом этаётганини қўшимча қилди. 

8 май куни Россиянинг Украинага ҳужуми

8 майга ўтар кечаси Россия қўшинлари Украинага йирик ракета ҳужуми уюштирди. Мамлакат энергетика вазири Герман Галушченко Полтава, Кировохрад, Запорижжя, Лвив, Ивано-Франкивск ва Винница вилоятларидаги электр энергиясини ишлаб чиқариш ва узатиш объектларига зарбалар ҳақида маълум қилди. Бундан ташқари, тунги ҳужум натижасида Кировоград ва Киев вилоятларида уч киши жабрланган. 

Эрталаб Харкивга ҳам зарба берилди – натижада беш киши, жумладан, спорт майдончасида футбол ўйнаётган уч нафар ўсмир жароҳат олди, деди Харкив вилояти маъмурияти раҳбари Олег Синегубов. 8 майда бир кун ичида Россия қўшинлари Украина ҳудудига 60 га яқин ракета ва 20 та Shahed дронларини учирди, деди президент Володимир Зеленский кечки видеомурожаатида. 

Россиянинг ўққа тутиши Украинадаги электр станцияларининг 80 фоизига зарар етказди 

Март ойида, Галушченко сўзларига кўра, Россиянинг ўққа тутиши Украинадаги иссиқлик электр станцияларининг 80 фоизигача ва гидроэлектр станцияларининг ярмидан кўпига зарар етказган. Айрим аҳоли пунктларида, жумладан миллиондан ортиқ киши яшовчи Харкив шаҳрида электр энергияси узилиб қолди. 

Россия қўшинлари Украинани ўққа тутишда янги тактикага ўтди – энди улар ҳар бир зарбада кўпроқ зарар етказиш учун «портловчи дронлар ва Эрон типидаги ракеталардан» фойдаланмоқда, деди Галушченко DW нашрига.