Қирғизистонда давлат ходимларига ҳафтада икки кун шахсий автомобилдан фойдаланиш тақиқланди

Энди давлат идоралари ходимлари ҳафтасига 2 кун жамоат транспортида ишга боради. Шу мазмундаги фармойиш Бишкек шаҳри мэри Ойбек Жунушалиев томонидан имзоланди. 

Қайд қилинишича, Қирғизистон пойтахтидаги экологик вазиятни яхшилаш, шунингдек, жамоат транспорти ҳаракати сифатини мониторинг ва таҳлил қилиш мақсадида Бишкек шаҳар мэрияси ходимларининг шахсий автомобиллардан фойдаланишига чеклов жорий этилмоқда. 

Шундай қилиб, чекловлар жорий этиш учун сешанба ва пайшанба кунлари шаҳарда транспорт ҳаракати энг тиғиз бўлган кунлар сифатида танланди. 

«Шу кунларда шахсий ва хизмат автомашиналаридан фойдаланишга чекловлар жорий этилиши йўллардаги тирбандликни камайтиради, шунингдек, бу ўз навбатида жамоат транспортига бўлган талабнинг ошишига хизмат қилади, транспорт тизимини ривожлантиради ва атмосферага зарарли моддалар чиқарилишини камайтиради», дейилади маъмурият хабарида. 

Маъмуриятнинг таъкидлашича, давлат ходимларининг жамоат транспортидан фойдаланиши фуқаролар ва бошқа ташкилотларга ўрнак бўлиб хизмат қилади, транспортнинг экологик тоза ва самарали усулларидан фойдаланишни рағбатлантиради. 

Қайд қилиш жоиз, Қирғизистон пойтахти Бишкек шаҳри дунёдаги энг ифлос ҳавога эга шаҳарлар рейтингида мунтазам равишда юқори ўринларни эгаллаб келади.