Нелсон Мандела партияси ЖАР сайловларида биринчи марта мутлақ кўпчиликни қўлга кирита олмади

Нелсон Мандела президент этиб сайланганидан кейин 1994 йилдан бери Жанубий Африкада (ЖАР) ҳокимият тепасида турган Африка Миллий Конгресси (АМК) партияси илк бор парламент сайловларида мутлақ кўпчиликни қўлга кирита олмади.

Овозларнинг 97 фоизидан ортиғи ҳисобланганда, АМК 40 фоизини, ўнг марказчи Демократик алянс 21,7 фоизини, сўл-популист MKP (Жанубий Африканинг собиқ президенти Жейкоб Зума партияси) 14,8 фоизини ва миллий коммунистик EFF 9,3 фоизини тўплади.

АМК энди парламентда ҳукмрон коалиция тузиши керак бўлади. Партия раиси Гведе Манташе сўзларига кўра, бу коалицияга Демократик алянс кириши даргумон. Унинг сўзларига кўра, АМК билан коалиция тузмоқчи бўлган партиялар ўз низомини мамлакатнинг қора танли аҳолиси имкониятларини кенгайтириш ғояларига мувофиқлаштириши керак бўлади.

Шу билан бирга, Демократик алянс раҳбари Жон Стинхусайн ўз партиясининг АМК коалициясига киришини истисно этмади. У, ўз навбатида, амалга ошириш учун зарур бўлган асосий талабларни илгари сурди: қонун ва конституцияга ҳурмат, иқтисодий ўсишга эришишда хусусий секторни давлат билан ҳамкор сифатида кўрадиган ижтимоий бозор иқтисодиёти, коррупцияга мутлақо тоқат қилмаслик, иқтисодий сиёсатга эътибор қаратиш, иш ўринлари яратиш.

1994 йилда Нелсон Мандела президент бўлгач, мамлакатда ўтказилган биринчи демократик сайловлардан бери АМК ҳар доим 50 фоиздан кўпроқ овозни қўлга киритган. Бироқ, коррупция, ишсизлик ва жиноятчиликнинг юқори даражасидан норозилик туфайли партияни қўллаб-қувватлаш сезиларли даражада камайди.