Худди Голливуд филмларидек: тошкентлик фуқаро қиёфасини ўзгартириб, банкни ўмармоқчи бўлди

Грим усулида бошқа шахс қиёфасига кирган шахс 286 минг АҚШ долларини ўмаришга уриниб кўрди, аммо банк ходимида уйғонган шубҳа бу режани чиппакка чиқарган.

Тошкентда қиёфасини ўзгартириб, банкни ўмармоқчи бўлган шахсга ҳукм ўқилган. Бу ҳақда ИИВ ахборот хизмати хабар бермоқда.

Маълум қилинишича, 67 ёшли шахс рус эркаги қиёфасига кириб, банкдаги омонатларни ўғирламоқчи бўлган. Эркакнинг айтишича, у қиёфасини ўзгартиришдан аввал шу мавзудаги қўлланмаларни ўқиган.

Сўнг қош ва киприкларини куйдириб, сочларини оққа бўяган ва осонгина қиёфасини ўзгартириб, чол қиёфасига кирган ва оқсоқланиб банклардан бирига кириб борган.

Гримдаги эркак омонатга қўйилган 286 минг доллардан ошиқ пулларни шундай йўл билан олиб чиқиб кетишни мақсад қилган.

“Замон” информацион дастурида кўрсатилган лавҳада айтилишича, биринчи кассада у сўраган пул чиқмагани учун эркак иккинчи ходимга мурожаат қилади. Шунда банк ғазначиси кўзойнак тақиб олган ва ҳасса ушлаган чол қиёфасидаги шахсдан шубҳаланади.

Ходима ҳужжатни орган ходимларига кўрсатмоқчи бўлганида кекса мижоз банкдан қочиб кетган. Шунда унинг қўлидаги омонатлардан бирининг эгасига тегишли паспорт сохта бўлгани ойдинлашади.

Ҳуқуқ тартибот органлари банкдаги кузатув камералари тасвирлари ва далилларни ўрганиб, қидирувдаги эркакни қамоқхонадан топишади. У ахлоқ тузатиш ишлари жазосини бузгани учун қайта қамалган экан.

Судда эркакнинг айби исботланади ва Жиноят кодексининг тегишли моддалари билан айбдор деб топилиб, қонуний жазосини олади. Ҳозирда у жазо муддатини ўтамоқда.

#Тошкент #банк #ўғрилик