“Сергелида ҳаёт қайнаяпти” — туманда аҳоли сони аслида 30 фоизга кўпроқлиги маълум бўлди

Илгари туман аҳолиси 181 минг нафар деб юритилган бўлса, аҳолини рўйхатга олиш натижасида бу ерда аслида 236 мингга яқин аҳоли яшаётгани маълум бўлди. Шавкат Мирзиёевга кўра, яқин йилларда Сергели аҳолиси 300 мингдан ошиши кутиляпти. Президент аҳоли сони ортиши билан боғча, мактаб, поликлиника каби қувватларни мутаносиб кўпайтириш кераклигини айтди.

Президент раислигида Тошкент шаҳри, хусусан Сергели туманини ривожлантириш юзасидан видеоселектор йиғилиши бўлиб ўтди.

Шавкат Мирзиёев сўнгги йилларда Сергели туманида катта ўзгаришлар бўлганини таъкидлади. Яқин-яқингача пойтахтнинг чекка ҳудуди ҳисобланган Сергелида аҳоли ишлаш, даромад топиш, дам олиш ва тиббий хизматлардан фойдаланиш учун асосан шаҳар марказига боришга мажбур эди. Бугун эса туманда муҳит ва одамларнинг яшаш тарзи тубдан ўзгарди.

Сергелида “ҳаёт қайнаяпти”. Сўнгги ўн йилда бу ерда 30 минг хонадонли янги уй-жойлар, умумий майдони 2 миллион квадрат метр бўлган саноат, савдо ва сервис обектлари барпо этилди.

Тадбиркорлар сони 2,5 мингтадан 6 минг 200 тага кўпайди. Туманда шаклланган бюджет тушумлари 382 миллиард сўмдан 2 триллион 200 миллиард сўмга, яъни 5,5 баробар ошди. Аҳоли учун 5 та йирик дам олиш маскани ва истироҳат боғлари ишга туширилди.

Тошкент вилоятидан ўтган 13 та маҳалланинг ҳисобига Сергели тумани ҳудуди 1 минг 800 гектарга кенгайиб, жами 5,6 минг гектарга етди. Сергелини бошқа туманлар ва шаҳар маркази билан боғлайдиган 9 километрлик йўл, 8 та стансиядан иборат янги метро линияси бунёд этилди.

Мактаб ўринлари 25 мингдан 38,5 мингга, боғча ўринлари 7,5 мингдан 15,5 мингга кўпайди. 50 та давлат ва хусусий клиника ташкил этилди.

Муаммолар ҳали кўп

Ривожланиш баробарида транспорт, йўл, электр, сув ва канализация каби инфратузилма тармоқларини яхшилаш бўйича ечимини кутаётган масалалар ҳам ҳали кўплиги қайд этилди.

Аҳолини хатловдан ўтказиш бўйича дастлабки натижалар Сергели туманида реал вазиятни аниқ кўрсатди. Илгари туман аҳолиси 181 минг нафар деб юритилган бўлса, хатлов натижасига кўра, ҳудудда аслида 236 мингга яқин аҳоли яшаётгани маълум бўлди.

Яқин йилларда Сергели аҳолиси 300 минг нафардан ортиши кутилмоқда. Шу боис, раҳбарларда уй-жой, боғча, мактаб, поликлиника ва иш ўринларини аҳоли ўсишига мос равишда кўпайтириш бўйича ҳозирдан аниқ режа ва дастур бўлиши зарурлиги таъкидланди.

Инвестиция лойиҳалари

Бу йил Сергелини ривожлантириш учун бюджетдан 173 миллиард сўм, банклар орқали 2 триллион 200 миллиард сўм ресурс ажратилган. Туман ҳокими ва мутасаддиларга ушбу маблағларни самарали ишлатиб, қўшилган қийматни 2-3 карра ошириш бўйича режаларни амалга ошириш вазифаси қўйилди.

Жорий йил туман ҳокимлари жами 9 миллиард долларлик инвестициявий лойиҳаларни амалга ошириши белгиланган. Сергелининг ўзига ўтган беш ойда 236 миллион доллар инвестиция киритилди. Йил якунигача 60 та лойиҳани бошлаш ҳисобидан яна 750 миллион доллар инвестиция жалб қилиш режалаштирилган.

Пойтахт шароитида саноат лойиҳаларини жойлаштиришда ер масаласи энг катта муаммо экани кўрсатиб ўтилди. Шу боис, “Янги авлод” саноат зонасидан пойтахтнинг 12 та туманига жой ажратиш ва инвестиция, саноат, иш ўрни, экспорт ҳамда бюджет тушуми кўрсаткичларини лойиҳа қилган туманнинг ўзига ёзиладиган тизимни жорий этиш топширилди.

Ерусти метроси ости бизнесга берилмоқда

Йиғилишда ер устидан ўтган метро йўналиши остида савдо ва сервис объектларини ташкил этиш тажрибаси кўриб чиқилди. Давлат ердан фойдаланиш ҳуқуқини аукционга чиқариб, лойиҳа ва инфратузилмасини тайёрлаб бермоқда, қолганини тадбиркорлар амалга оширмоқда.

Сергелида метро линиясининг яна 8,5 километр қисмида шундай ишлар якунига етказилса, 137 та савдо-сервис объекти, 1-1,5 мингта иш ўрни яратилади, туман бюджетига 20-25 миллиард сўм қўшимча тушум тушади.

Умуман, ер усти метро линиясининг Яшнобод, Сергели ва Янгиҳаёт туманларидан ўтган 23 километр ҳудудида бундай лойиҳалар амалга оширилса, яна 400 та тадбиркор бизнес бошлаб, 3 мингта иш ўрни яратиши мумкин.

Қурилишда янги тажриба

Ерларнинг қурилишга рухсати, архитектура-режалаштириш топшириғи ва лойиҳаси билан бирга тайёр пакет шаклида аукционга чиқариш бўйича Сергелида янги тажриба бошланди.

Илк бор Янги Бунёдобод маҳалласида 70 сотих ер уй-жой қуриш учун янгича ёндашув асосида ауксионга қўйилди. Бошланғич нархи 14 миллиард сўм бўлган ушбу ер участкаси 40 миллиард сўмга сотилди.

Энг муҳими, ерни олган тадбиркор шу куннинг ўзида қурилишни бошлади. Илгари ҳужжатларни келишишга бир йилгача вақт кетар эди.

Шавкат Мирзиёев мазкур тажрибани нафақат ер участкалари, балки сотувга қўйилаётган давлат объектлари ва саноат зоналарига ҳам татбиқ этиш зарурлигини таъкидлади.