G7 Хитой банкларини Россияга қарши санкцияларга риоя қилиш ҳақида огоҳлантиради

Reuters хабарига кўра, «катта еттилик» Хитой кичик банкларига Ғарбнинг Россияга қарши санкцияларини бузиш оқибатлари ҳақида огоҳлантириш беришни режалаштирмоқда. Агентлик 9 июн, якшанба куни АҚШ маъмуриятидаги икки манбага таяниб, G7 келгуси ҳафтада Хитойнинг кичик молиявий институтларига янги қаттиқ огоҳлантириш билан чиқишини маълум қилди. 

13-15 май кунлари Италияда бўлиб ўтадиган G7 саммитидаги шахсий учрашувлар чоғида Россия Федерацияси ва Хитой ўртасидаги савдо ҳажмининг ўсиши Украина мудофаасига таҳдид солаётганига алоҳида эътибор қаратилиши кутилмоқда. Асосий эътибор Хитойнинг энг йирик банклари эмас, балки кичикроқ институтлари ҳаракатларига йўналтирилади. Катта эҳтимол билан, ушбу маслаҳатлашувлар натижаларига кўра, Хитой банклари бўйича расмий баёнот берилади. 

Шу билан бирга, Еттилик гуруҳи Россия билан ҳамкорлик қилаётган Хитой банкларига нисбатан дарҳол чеклов чораларини кўрмаслиги мумкин, деб ёзади Reuters. 

АҚШ Россия мудофаа саноати билан ишлайдиган банкларга санкциялар қўлламоқчи

2023 йил декабр ойи охирида АҚШ президенти Жо Байден хорижий молия институтлари Россия ҳарбий-саноат комплекси манфаатларини кўзлаб, Россиянинг Украинага бўлган тажовузкорлигини қўллаб-қувватласа, уларга нисбатан санкциялар қўллаш имконини берувчи фармонни имзолади. Россия мудофаа саноати манфаати йўлидаги фаолият учун Вашингтоннинг санкциялар рўйхатига киритилган «ҳар қандай шахс манфаатларини кўзлаб ёки унинг номидан муҳим операцияларни амалга оширган» ёки бундай операцияларни амалга оширишга ҳисса қўшган молия институтлари жавобгарликка тортилиши мумкин, дейилади ҳужжатда. 

Бундан ташқари, фармонга кўра, операцияларни амалга оширадиган ёки «Россия ҳарбий-саноат базаси билан боғлиқ ҳар қандай хизматларни кўрсатадиган, шу жумладан тўғридан тўғри ва билвосита Россия Федерациясига ҳар қандай товарлар ёки товарлар синфини сотиш, етказиб бериш ёки топширишга» алоқадор молия институтлари жаримага тортилиши мумкин. 

Шундан сўнг, Хитой банклари Россия билан операцияларини чеклаши ҳақида хабарлар пайдо бўлди. Хусусан, Хитойнинг айрим банклари Россиядан юандаги тўловларни қабул қилишни тўхтатди. Ушбу молия институтларининг мижозлари тегишли билдиришномалар олди ва тўловлар қайтарила бошланди.