Германия НАТОнинг мудофаа харажатлари бўйича нормасини ортиғи билан бажаради

Жорий йилда Германия мудофаа эҳтиёжлари учун 90,6 миллиард евро – ЯИМнинг 2,12 фоизини ажратади. Умуман олганда, Шимолий Атлантика алянси 32 давлатидан 23 таси НАТОнинг икки фоизлик нормасини бажаради.

Фото: Noah Wedel/picture alliance

Германия бу йил мудофаа эҳтиёжлари учун рекорд даражада 90,6 миллиард евро ажратади ва бунинг натижасида НАТО нормаси - ялпи ички маҳсулотнинг икки фоизлик кўрсаткични ортиғи билан бажаради. 18 июн, сешанба куни эълон қилинган НАТО прогнозига кўра, Германия томонидан ажратиладиган маблағ ЯИМнинг 2,12 фоизини ташкил қилади.

Россиянинг Украинага қарши уруши фонида бу йил Германия биринчи марта НАТОнинг 2014 йилда белгиланган ЯИМ икки фоизи миқдоридаги ҳарбий харажатлар нормасига жавоб беради. Умуман олганда, алянснинг 32 давлатидан 23 таси белгиланган квотани бажариши керак, деди алянс бош котиби Йенс Столтенберг.

«НАТО бўйича иттифоқчилар жорий йилда мудофаа харажатларини 18 фоизга оширмоқда, бу ўн йилликлардаги энг катта ўсишдир», деди у 17 июн куни кечқурун Оқ уйда АҚШ президенти Жо Байденга. Столтенберг Вашингтонга алянс ташкил этилганининг 75 йиллигига бағишланган юбилей саммитига тайёргарлик кўриш учун келган. Учрашув июл ойида АҚШда бўлиб ўтади.

НАТОнинг мудофаа харажатлари

2014 йилда НАТОнинг фақат учта давлати икки фоизлик нормага амал қилган – АҚШ, Британия ва Греция. Ўтган йили 11 давлат квотани бажарган ёки ошириб юборган. Германия бу йил биринчи марта стандартни бажаришга ваъда берди.

Байденнинг АҚШда бўлажак президентлик сайловларидаги рақиби, собиқ президент Доналд Трамп сайловолди ташвиқоти давомида иттифоқчиларни мудофаа харажатларини оширишга қайта-қайта чақирган. Феврал ойида у Россия томонидан ҳужумга учраса, Қўшма Штатлар ҳарбий эҳтиёжлар учун етарли маблағ сарфламаган иттифоқчиларга ёрдамга келмаслиги билан таҳдид қилган. Трамп бунинг ўрнига Россияни бундай иттифоқчилар билан хоҳлаганини қилишга ундашини айтди.

Столтенберг Welt газетасига берган интервюсида Трампни ҳимоя қилди ва бундай баёнотлари билан у НАТО мамлакатлари хавфсизлигига рахна солмаслигини айтди. «Доналд Трамп НАТОни танқид қилмади, унинг танқиди НАТОга етарлича сармоя киритмаётган алянс аъзоларига қаратилган эди», деб тушунтирди Столтенберг.