ACEA: Германия Европада электромобиллар сотувини секинлаштирмоқда

Германияда 2024 йилнинг январидан майигача электр транспорт воситаларига талаб 30 фоизга камайди. Францияда бу кўрсаткич 5,4 фоизга, бутун Европа Иттифоқида эса 2 фоизга ошиб, 556 минг донани ташкил этди, деб хабар берди ACEA ассоциацияси.

Фото: Christian Charisius/dpa/picture alliance

Европа автомобил ишлаб чиқарувчилари ассоциацияси (ACEA) маълумотларига кўра, Европа бўйлаб электромобилларга бўлган талаб динамикасида сезиларли фарқлар мавжуд. Ташкилотнинг 20 июн, пайшанба куни хабар беришича, Германияда янги электромобиллар савдоси май ойида ўтган йилнинг шу ойига нисбатан 30,6 фоизга камайди.

Белгия ва Францияда электр транспорт воситаларига талаб ортиб бормоқда

Европанинг Германиядан кейин иккинчи йирик электр автомобил бозори бўлган Францияда худди шу кўрсаткич 5,4 фоизга, учинчи ўриндаги Белгияда эса 44,8 фоизга ошгани таъкидланган.

Жорий йилнинг дастлабки беш ойида 2023 йилнинг шу даврига нисбатан Германияда электромобилларга талаб 16 фоизга камайган бўлса, Францияда бу кўрсаткич 23 фоизга ошган. Талабнинг пасайиши Италияда ҳам кузатилмоқда (2024 йилнинг январидан майигача бўлган даврда минус 19 фоиз), Нидерландия ва Испанияда сотувлар ўсиши қайд этилган.

Европа Иттифоқи бўйлаб май ойида электромобилларни рўйхатга олиш 12 фоизга қисқариб, 114 308 донани ташкил этди, уларнинг автомобил бозоридаги улуши эса 12,5 фоизга камайди. Йилнинг беш ойида бу кўрсаткич 2 фоизга ошиб, 556 минг 276 донани ташкил қилди. Шу билан бирга, барча турдаги двигателли автомобилларнинг умумий сотуви май ойида Европа Иттифоқининг барча мамлакатларида 3 фоизга камайиб, 912 мингта автомобилга тенг бўлди, 2024 йилнинг беш ойида эса бу кўрсаткич 4,6 фоизга ошиб, 4,6 миллион донани ташкил этди, дея хабар беради ACEA.

Германияда талаб пасайиши давлат томонидан қўллаб-қувватлов тугаши билан боғлиқ

2023 йилда давлат томонидан қўллаб-қувватлов тўхтатилиши фонида Германияда электромобилларга бўлган талаб пасайиб бормоқда: ўтган йил бошида гибрид двигателли автомобиллар харидорлари давлат субсидияларидан маҳрум бўлди.

Бундан ташқари, Германияда электромобилларга талабнинг пасайишига, экспертлар фикрига кўра, ушбу мамлакатда экологик тоза ёнилғидан фойдаланиш имкони бўлган ички ёнув двигателларига эга автомобиллар оммабоплиги қайта муҳокама қилинаётгани ёрдам берди.

2023 йилда Европа Иттифоқида 10,5 миллион янги автомобил сотилган, бу 2022 йилга нисбатан 14 фоизга кўпдир.