Tesla Model S ва Model X электромобилларини ишлаб чиқаришни тўхтатмоқда

АҚШнинг CNN телеканали 29 январ, пайшанбага ўтар кечаси (маҳаллий вақт бўйича) хабар беришича, уларни ишлаб чиқаришни 2026 йилнинг иккинчи чорагида босқичма-босқич тугатиш режалаштирилмоқда. Маскнинг айтишича, Калифорния штатидаги Фримонт шаҳрида жойлашган, Model S ва Model X ишлаб чиқарилган завод Optimus номли одамсимон роботларни ишлаб чиқариш учун қайта жиҳозланади.

Бундан ташқари, CNN таъкидлашича, Tesla раҳбари “компаниянинг электромобиллар савдоси — у дунёнинг оммавий бозорига чиқишига ёрдам берган маҳсулот — яқин орада Tesla учун иккинчи даражали масалага айланиши мумкинлигига ишора қилди”. Tesla икки флагман электромобил моделини ишлаб чиқаришни тўхтатишини 2025 йил охирида қайд этилган фойда ва сотув ҳажмлари сезиларли пасайгани фонида эълон қилди.

Нашрга кўра, Model S ва Model X’дан воз кечиш Илон Маск компаниясининг айланмасига катта таъсир кўрсатмаслиги эҳтимол. Телеканал: “Model S ва Model X ишлаб чиқариш тўхтатилиши Tesla сотувларига чекланган таъсир кўрсатади. Иккаласи биргаликда компаниянинг бутун дунё бўйича етказиб беришлар умумий ҳажмининг атиги 3 фоизини ташкил қилади”, — деб билдирган.

CNN, шунингдек, кўплаб америкалик ва европалик истеъмолчилар орасида Tesla’нинг имижига Маскнинг сиёсий фаоллиги ва АҚШ президенти Доналд Трамп билан сайлов кампанияси даврида ҳамда Трамп президентлигининг илк ойларидаги ҳамкорлиги сезиларли таъсир кўрсатганини қайд этади — бу Маск ҳукумат самарадорлиги департаменти (DOGE)да ишлаган даврга тўғри келган.

Европа Иттифоқида 2025 йилда Tesla электромобиллари сотув ҳажми икки баравардан ҳам кўпроқ пасайди. Хусусан, ЕИ мамлакатларида апрел ойида 5475 та Tesla автомобили сотилган — бу 2024 йилнинг шу ойига нисбатан 52,6 фоиз кам, деб хабар берган 27 май куни Европа автомобил ишлаб чиқарувчилар уюшмаси ACEA. 2025 йилнинг илк тўрт ойида Tesla сотув кўрсаткичлари йиллик ҳисобда 46,1 фоизга пасайиб, 41 677 та автомобилни ташкил этган.

Шу билан бирга, ACEA маълумотларига кўра, ЕИда апрел ойида умумий электромобиллар сотуви 2024 йил апрелига нисбатан 26,4 фоизга ошган. Бунда электр узатмали автомобилларнинг улуши 15,3 фоизни ташкил этган. Энг оммавий модель Skoda Elroq бўлган, аввалги етакчи — Tesla Y эса фақат 9-ўринни эгаллаган.

Умуман олганда, 2025 йил май ойига оид маълумотларга кўра, Маск компаниясини сотув кўрсаткичлари бўйича тўққизта рақиб ортда қолдирган — улар орасида Германиянинг Volkswagen ва BMW, Франциянинг Renault ҳамда Хитойнинг BYD бренди ҳам бор.