НАТО Россия қўшинлари Украинада йирик ютуқларга эришишини кутмаяпти

Россия Украинада ҳозирча маргинал даражада муваффақиятга эришди, деди НАТО бош котиби Йенс Столтенберг. Украина президенти Зеленский алянснинг Брюсселдаги қароргоҳига ташриф буюрди.

Фото: Reuters

НАТО, алянснинг истеъфога чиқаётган бош котиби Йенс Столтенбергнинг сўзларига кўра, Россия қўшинлари Украинадаги йирик ютуқларга эришишини кутмаяпти. «Улар шу йил бошида ва ёзда яна ҳужум уюштиришга ҳаракат қилишди, бироқ ҳозирча фақат маргинал муваффақиятга эришдилар. Биз Россияда катта ютуқларга эришиш имконияти ёки кучи бор, деб ишониш учун ҳеч қандай аломат ёки сабаб кўрмаяпмиз», - дейди Столтенберг 27 июн, пайшанба куни AFP’га берган интервюсида.

Алянс бош котибининг фикрича, Москва Украинага босимни оширишда ва ҳудудга ҳаво зарбаларини беришда давом этади. Шу билан бирга, Столтенбергнинг таъкидлашича, украиналиклар ҳали ҳам фронт чизиғини ушлаб туришга қодир, улар ҳам фронтда, ҳам Россиядаги нишонларга ҳужумлар натижасида россияликларга катта зарар етказяпти.

Йенс Столтенберг, шунингдек, Қўшма Штатлар ноябр ойида бу мамлакатда бўлиб ўтадиган президентлик сайловлари натижаларидан қатъи назар, НАТОнинг ишончли иттифоқчиси бўлиб қолишига ишонч билдирди, чунки бу, унинг фикрича, ўз манфаатларига жавоб беради. Шу муносабат билан AFP АҚШ президенти Байденнинг сайловдаги рақиби Доналд Трамп сайловолди ташвиқоти чоғида Европадаги мудофаа учун етарли маблағ ажратмаётган иттифоқчиларни қўллаб-қувватлашни тўхтатиши билан таҳдид қилганини ва ҳатто Россияни бундай давлатлар билан хоҳлаган ишини қилишга ундаганини эслатади.

Зеленский НАТОнинг Брюсселдаги қароргоҳида

27 июн куни Украина президенти Володимир Зеленский Брюсселга сафари чоғида НАТО штаб-квартирасига ташриф буюрди ва у ерда Столтенберг билан музокаралар ўтказди. Учрашув мавзуларидан бири июл ойида Вашингтонда бўлиб ўтадиган НАТО саммити бўлди. Зеленский ушбу учрашувга меҳмон сифатида таклиф қилинган эди, бироқ Столтенберг НАТОда бу масала бўйича консенсус йўқлиги сабабли Украинанинг иттифоққа эрта киришга умидларини сўндирди.

Июлдаги саммитда НАТО давлатлари фақат Украинага узоқ муддатли ҳарбий ёрдамни кафолатлаши ва Германиянинг Висбаден шаҳрида режалаштирилган НАТО миссиясининг штабини очишга, Украинага қурол етказиб беришни мувофиқлаштиришга ва украиналик аскарларни ўқитишга ваъда бериши кутилмоқда.

НАТО штаб-квартирасига ташрифи олдидан Зеленский Брюсселдаги ЕИ саммитида иштирок этди ва у ерда Европа комиссияси раиси Урсула фон дер Ляйен ҳамда Европа кенгаши раиси Шарл Мишел билан биргаликда Украина ва Европа Иттифоқи ўртасида хавфсизлик битимини имзолади.