Ўзбекистон Қашғар–Андижон темирйўли қурилиши учун 255 млн доллар ажратади

Ўзбекистон президентининг қарори билан, “Хитой – Қирғизистон – Ўзбекистон” темирйўли лойиҳасини биргаликда амалга ошириш бўйича имзоланган ҳукуматлараро битим тасдиқланди.

Қарорга кўра, темирйўл қурилиши бўйича қўшма лойиҳа компаниясининг устав капиталидаги Ўзбекистон ҳукумати улушининг бир қисмини шакллантириш учун 255 млн доллар ажратилади.

Бу маблағ Тикланиш ва тараққиёт жамғармасининг кредити шаклида, 7 йиллик имтиёзли давр билан 15 йил муддатга, йиллик 5 фоиз ставкада “Ўзбекистон темир йўллари” АЖга босқичма-босқич ажратилади.

255 миллион долларнинг 14 млн долларлик қисми 2024 йилда ажратиши кўзда тутилган.

Лойиҳа учун, шунингдек, қонунчилик ҳужжатларида тақиқланмаган бошқа манбалардан ҳам маблағ йўналтирилиши қайд этилган.

Эслатиб ўтамиз, Хитой, Қирғизистон ва Ўзбекистон ўртасидаги битим шу йил 6 июнда Пекинда имзоланган эди.

Битимга мувофиқ, темирйўл “Қашғар – Торугарт – Макмал – Жалолобод – Андижон” йўналиши бўйлаб ўтади.

Бу коридорда юк ташиш ҳажми йилига 15 миллион тоннагача етиши, товарларни якуний истеъмолчиларга етказиш муддати 7 кунга қисқариши кўзда тутилган. Бундан ташқари, замонавий транзит ва логистика инфратузилмаси, омборхоналар ва терминаллар яратилади.

Аввалроқ қурилиш ишлари шу йил октябрда бошланиши айтилганди.