Қозоғистон Ўзбекистон билан кўп йиллик шартномани бекор қилади

Ўзаро ҳисоб-китоблар тўғрисидаги келишув ўз аҳамиятини йўқотгани таъкидланмоқда.

Фото: mudofaa.uz

Қозоғистон Ўзбекистон билан ўзаро ҳисоб-китобларни ташкил этиш бўйича узоқ муддатли келишувни бекор қилади, бу ҳақда Tengrinews хабар берди.

Қонунлар лойиҳаси муҳокамаси порталида эълон қилинган Қозоғистон ҳукумати қарори лойиҳасида келишувнинг бекор қилинишига Ўзбекистонда сўм валютасининг муомалага киритилиши сабаб бўлгани айтилган.

Қайд қилинишича, келишув 1994 йилда Ўзбекистон Республикаси томонидан миллий валюта – сўм муомалага киритилишидан олдин тузилган ва энди ўз аҳамиятини йўқотган.

«Аҳамияти йўқолгани туфайли келишувнинг амал қилиши тўхтатилади. Халқаро шартноманинг амал қилиш доираси ҳозир Қозоғистон Республикаси қонунчилиги билан тартибга солинади», дейилади лойиҳанинг тушунтириш хатида.

Қозоғистон Ташқи ишлар вазирлигига қонун ҳужжатларида белгиланган тартибда Ўзбекистон ҳукуматига келишувни денонсация қилиш тўғрисида билдиришнома юбориш топширилган.

Денонсация — бу давлатнинг ўзи тузган шартномадан расман воз кечиши. Бу шартнома мажбуриятларини бекор қилишнинг қонуний йўлидир. Денонсация қилиш қоидалари ва тартиби шартноманинг ўзида кўзда тутилган.