«Хитой-Қирғизистон-Ўзбекистон» темир йўлини қуриш бўйича битим имзолангани тарихий воқеа бўлди — Мирзиёев
Ўзбекистон президенти Шавкат Мирзиёев ва Қирғизистон президенти Садир Жапаров 18 июл куни Тошкентда оммавий ахборот воситалари вакиллари учун баёнот бердилар.
![](https://storage.kun.uz/source/10/grUKKk9V25rc07VMoFcW3i10n-0D6YyC.jpg)
Ўзбекистон раҳбари Қирғизистон президентининг давлат ташрифи тарихий воқеа бўлгани ва мамлакатларимиз кўп қиррали ҳамкорлигида янги даврни бошлаб берганини таъкидлади. Очиқ, конструктив ва дўстона руҳда ўтган музокаралар якунлари катта мамнуният билан қайд этилди.
Келгусида ўзаро ҳамкорликни янада юқори босқичига кўтариш учун асос бўлиб хизмат қиладиган кенг қамровли стратегик шериклик муносабатларини янада чуқурлаштириш ва кенгайтириш тўғрисидаги қўшма баёнот асосий сиёсий ҳужжат бўлди.
Президентлар раислигидаги Давлатлараро кенгаш тузиш бўйича келишувга эришилди.
Етакчилар бундан буён ҳам парламентлар, ҳукуматлар, ташқи сиёсат идоралари, тармоқ вазирликлари, ҳудудлар, ишбилармон ва жамоатчилик доиралари даражасида яқин сиёсий мулоқотни ривожлантириш ва фаол алоқаларни давом эттиришга келишиб олдилар.
Томонлар минтақавий ва халқаро платформалар, жумладан, БМТ, ШҲТ, МДҲ, Туркий давлатлар ташкилоти, Марказий Осиё давлатлари раҳбарларининг Маслаҳат учрашувлари ва бошқа форматлардаги ташаббусларни ўзаро қўллаб-қувватлашни давом эттирадилар.
Мирзиёев Ўзбекистон-Қирғизистон ҳамкорлигининг янги кенг қамровли иқтисодий кун тартибини шакллантириш муҳимлигини таъкидлади.
Шу мақсадда ўзаро савдо ҳажмини ошириш дастури қабул қилинди. Бундан ташқари, мамлакатлар пойтахтида савдо уйлари ташкил этилади, яқин йилларда товар айирбошлаш ҳажмини 2 миллиард долларга етказиш учун узоқ муддатли экспорт-импорт шартномалари портфели тайёрланади.
Экспортни қўллаб-қувватлаш ва сертификатларни тан олиш воситалари жорий этилади, мева-сабзавот ва чорвачилик маҳсулотлари учун «яшил йўлак» ишга туширилади.
Етакчилар саноат кооперациясида, энг аввало, икки мамлакат иқтисодиётининг бир-бирини тўлдирадиган тармоқларида янги ўсиш нуқталарини яратиш масалаларига алоҳида тўхталдилар. Булар энергетика, автомобилсозлик, транспорт ва логистика, электротехника, тўқимачилик, агросаноат ва бошқа тармоқлардаги лойиҳалардир.
Бугун Фарғона ва Наманган вилоятларида қуёш станцияларини қуриш, Чуй вилоятида автомобиллар, Қора-Балтада тўқимачилик маҳсулотлари ишлаб чиқариш бўйича муҳим лойиҳаларга старт берилди. Бундай лойиҳаларни қўллаб-қувватлаш мақсадида Ўзбекистон-Қирғизистон тараққиёт жамғармасининг устав капиталини 200 миллион долларга етказишга қарор қилинди.
Ҳудудлар ўртасидаги тизимли мулоқотни кенгайтириш муҳимлиги қайд этилди. Чегараолди вилоятлар ҳокимлари кенгаши ишини фаоллаштиришга келишиб олинди. Ўзаро ташрифлар жадвали тайёрланиб, ҳамкорлик бўйича «йўл хариталари» янгиланади. Лойиҳалар портфелини йил якунига қадар 1 миллиард долларга етказиш вазифаси қўйилди.
Давлат раҳбарлари қишлоқ хўжалиги соҳасида янги имкониятларни белгилаб бердилар. Қишлоқ хўжалиги экинларини биргаликда етиштириш, фючерс битимларидан фойдаланган ҳолда интенсив боғлар ва агрокластерлар ташкил этиш шулар жумласидан.
Томонлар минтақада транспорт боғлиқлигини мустаҳкамлаш бўйича биргаликдаги саъй-ҳаракатларни фаоллаштиришга келишиб олдилар.
- «Хитой-Қирғизистон-Ўзбекистон» темир йўлини қуриш стратегик лойиҳаси бўйича уч томонлама битим имзолангани тарихий воқеа бўлди, - деди Мирзиёев.
Транспорт йўлакларини ривожлантириш соҳасидаги янги лойиҳаларни ўрганиш учун экспертлар гуруҳини ташкил этишга келишиб олинди.
Давлат раҳбарлари энергетика соҳасидаги ҳамкорликка устувор аҳамият қаратдилар.
Томонлар кичик гидроэнергетика соҳасида алоҳида ҳамкорлик дастурини тайёрлашга келишиб олдилар.
- Қамбарота ГЭС қурилиши тўғрисида уч томонлама битим қабул қилишни тезлаштириш чораларини кўрамиз. Ушбу мегалойиҳа, шубҳасиз, бутун минтақамизнинг барқарор тараққиётига хизмат қилади, - деди Ўзбекистон президенти.
Маданият, ёшлар, таълим, фан ва спорт соҳаларида фаол мулоқот ва алмашинувлар давом эттирилади.
Ташриф давомида Ўзбекистоннинг Иссиқкўлдаги санаторий-курорт мажмуалари тўғрисида битим имзоланди. Июл ойи бошида Ўзбекистон томони учта объектни ишга туширди, улар меҳмонларни қабул қилмоқда. Туризм инфратузилмасини ривожлантириш бўйича янги лойиҳалар ишлаб чиқилмоқда.
Самарали музокаралар якунида ўзаро ҳамкорликнинг муҳим йўналишларида салмоқли битимлар тўплами қабул қилинди.
Мавзуга оид
![](https://storage.kun.uz/source/thumbnails/_medium/10/PpxDru8KLkNeiK5n2Q6u2c3fz8Lpvtun_medium.jpg)
18:55 / 07.09.2024
Қирғизистон «Толибон»ни тақиқланган ташкилотлар рўйхатидан чиқарганини тасдиқлади
![](https://storage.kun.uz/source/thumbnails/_medium/10/UZiYSciYIRSuazHEu34qmJZY_Avb1vrN_medium.jpg)
17:48 / 07.09.2024
Қирғизистон-Ўзбекистон чегарасидаги «Қора-Сув» ва «Интимақ» назорат-ўтказиш пунктлари қайта очилади
![](https://storage.kun.uz/source/thumbnails/_medium/10/PbukugxOHS6iyQNs486t8w-I3fte8Tdf_medium.jpg)
21:43 / 06.09.2024
Асқар Акаев Қирғизистон парламентидан ўзига собиқ президент мақомини қайтаришни сўради
![](https://storage.kun.uz/source/thumbnails/_medium/10/WP-KNTtFb3WuvITScWdvEkgKHm-bB2mM_medium.jpg)
18:39 / 06.09.2024