Париждаги Олимпиадага фақат 15 нафар россиялик спортчи боради

Олимпиадада иштирок этишга розилик берган Россия Федерациясининг барча спортчилари нейтрал мақомда қатнашади. Олимпиада ўйинларида Беларусдан ҳам 16 нафар спортчи бўлади.

Фото: AP

Халқаро олимпия қўмитаси (ХОҚ) сайтида эълон қилинган рўйхатга кўра, Париждаги ёзги Олимпиада ўйинларида Россиядан бор-йўғи 15 нафар спортчи иштирок этади. Улар нейтрал мақомда беллашадилар. Россия оммавий ахборот воситаларининг 18 июл, пайшанба куни хабар беришича, бу Олимпиадага борадиган россияликларнинг якуний рўйхати.

Аввалроқ ХОҚ матбуот хизмати россиялик спортчилар номини 16 июл куни эълон қилиш ниятида эканини маълум қилганди, бироқ ХОҚ сайтидаги нашрга кўра, рўйхат 13 июлдан бери янгиланмаган. Рўйхатга етти нафар теннисчи, уч велопойгачи, уч байдарка ва каноэда эшкак эшувчи, сузувчи ва батутда сакровчи кирди.

Эълон қилинган спортчилар орасида Тамара Дронова, Алена Иванченко, Глеб Сирица (велоспорт), Анжела Бладцева (батут), Даниил Медведев, Роман Сафиуллин, Екатерина Александрова, Мирра Андреева, Павел Котов, Диана Шнайдер, Елена Веснина (теннис), Алексей Коровашков, Захар Петров, Олеся Ромасенко (байдарка ва каноэда эшкак эшиш) ва Евгений Сомов (сузиш) бор.

Беларусдан келадиган иштирокчилар

Париж Олимпиадасида Беларусдан ҳам 16 нафар спортчи қатнашади – Абубакар Хаслаханов (юнон-рум кураши), Анна Терех (велоспорт), Евгений Золотой, Татяна Климович (академик эшкак эшиш), Владислав Кравец, Юлия Трушкина (байдарка ва каноэда эшкак эшиш), Иля Шиманович, Анастасия Шкурдай, Алина Змушко (сузиш), Виолетта Бордиловская, Иван Литвинович (батутда сакраш), Дариа Чуприс, Александра Петрова (ўқ отиш), Георгий Гурциев (таэквондо), Сюзанна Володко, Евгений Тихонцов (оғир атлетика).

26 июлдан 11 августгача бўлиб ўтадиган Олимпиадада Россия ва Беларус спортчилари расман «индивидуал нейтрал спортчилар» сифатида иштирок этишади. Мусобақаларда бу икки давлатнинг ҳар қандай рамзлари тақиқланади. Россия Федерацияси ва Беларус олимпия терма жамоалари Россиянинг Украинага қарши уруши ва Беларуснинг Россияни қўллаб-қувватлагани сабабли Париждаги Олимпиададан четлатилди.

Умуман олганда, ХОҚ Олимпиадада нейтрал мақомда қатнашиш учун россиялик спортчиларга 54 та, беларусларга 28 та квота ажратди. Велоспорт, кураш, дзюдо, теннис каби спорт турларида кўплаб россиялик спортчилар ХОҚ таклифларини рад этишди. Оғир атлетика ва теннис бўйича бир қатор беларуслик спортчилар ҳам таклифларни қабул қилмади.