Камала Ҳаррисни АҚШ Демократик партияси делегатларининг аксарияти қўллаб-қувватлади

АҚШ президенти Жо Байден пойгадан чиққанидан сўнг, вице-президент Камала Ҳаррис бўлажак сайловларда номзод бўлиш учун Демократик партия делегатларининг кўпчилиги томонидан қўллаб-қувватланганини эълон қилди. «Бугун кечаси партия номзоди учун зарур бўлган кенг кўламли қўллаб-қувватлашга эришганимдан фахрланаман», деди у 22 июл, душанба куни.

Ҳарриснинг айтишича, у «тез орада номзодликни қабул қилишни интиқлик билан кутмоқда».

Ҳаррисни камида 1976 делегат қўллаб-қувватлади

2500 дан ортиқ делегатлар Камала Ҳаррисни қўллаб-қувватлашга қарор қилишди, дейилади AP томонидан Демократик партия қурултойи делегатлари ўртасида ўтказилган сўров натижаларида. Бу кўрсаткич талаб қилинадиган кўпчиликдан анча юқори – деярли 4000 кишидан 1976 нафардан кам бўлмаслиги керак. Бундан ташқари, CNN ва бошқа Америка оммавий ахборот воситалари Демократик партия делегатлари Ҳаррисни зарур даражада қўллаб-қувватлагани ҳақида хабар беришди.

Бошқалар қаторида вице-президентни партиянинг бир қатор етакчи аъзолари, жумладан, Вакиллар палатаси собиқ спикери Нэнси Пелоси ҳам қўллаб-қувватлади. Бироқ Конгресснинг ҳар икки палатасидаги демократлар етакчилари ҳозирча бу борада баёнот бермаган. 

Бундан ташқари, Ҳаррис Байден курашни давом эттиришдан бош тортганини эълон қилганидан кейин 24 соат ичида рекорд миқдорда – 81 миллион доллар маблағ йиғди. Камала Ҳарриснинг номзодини расман кўрсатиши мумкин бўлган демократлар қурултойи 19-22 август кунлари Чикагода бўлиб ўтади. 

Жо Байденнинг сайловдан воз кечиши

Жо Байден 21 июл куни АҚШ президентлиги сайловидан ўз номзодини қайтариб олишини эълон қилган эди. Амалдаги давлат раҳбари бу қарорни Демократик партия ва бутун мамлакат манфаатларини кўзлаб қабул қилганини алоҳида таъкидлади. Байден тез орада халққа мурожаат қилиб, тафсилотларни айтиб беришини билдирди. Унинг қўшимча қилишича, амалдаги муддатининг қолган қисмида асосий эътиборини президентлик вазифаларини бажаришга қаратади.

Байден ўз ўрнига Камала Ҳаррисни таклиф қилиб, уни «тўлиқ қўллаб-қувватлашини» билдирди. «Демократлар - бирлашиш ва Трампни енгиш вақти келди. Келинг, буни қилайлик!» - деб ёзди у X ижтимоий тармоғида.

Кейинчалик амалдаги вице-президент Камала Ҳаррис АҚШ президентлигига номзодини қўйишни режалаштираётганини маълум қилди. Америка ОАВ унинг сўзларидан иқтибос келтирди: «Президентнинг тасдиғини олиш мен учун катта шараф ва мен бу номзодликни қўлга киритиш ва ғалаба қозониш ниятидаман». Ҳаррис республикачи Доналд Трампни мағлуб этиш учун «Демократик партия ва халқни бирлаштириш» мақсадида «ҳамма нарсани қилишини» қўшимча қилди.