Adidas супермодел Белла Хадид иштирокидаги кроссовка рекламасини ўз ресурсларидан олиб ташлади

Adidas бош директори Бьорн Гульден келиб чиқиши фаластинлик бўлган супермодел Белла Хадид иштирокидаги кроссовкалар рекламаси учун узр сўради. Bloomberg’нинг ёзишича, реклама жамоатчилик ўртасида кескин норозилик келтириб чиқарган.

«Adidas бош директори Белла Хадид иштирокидаги реклама кампанияси учун узр сўрайди… Adidas AG ўзининг SL 72 кроссовкасининг реклама кампаниясида хатоликка йўл қўйди ва бундай хатоликлардан қочиш мақсадида ўз ҳаракатларини кўриб чиқмоқда», — дея ёзади агентлик Гульденнинг сўзларига таяниб.

Компания бош директори мазкур воқеа сабаб узр сўраганидан кейин Adidas «олдинга ҳаракат қилишни» давом эттиришини таъкидлаган.

Аввалроқ моделнинг ўзи ҳам ижтимоий тармоқлар орқали рекламадаги иштироки учун кечирим сўраб чиққанди, у реклама қилинаётган оёқ кийим ва 1972 йили Мюнхенда бўлиб ўтган Олимпиада ўйинларида юз берган «даҳшатли воқеалардан» хабари бўлмаганини билдирган.

Ундан олдин TMZ портал Хадид Adidas компаниясини «оммавий масъулият йўқлиги учун» судга бермоқчи экани ҳақида ёзганди. 

Германиянинг Berliner Zeitung газетаси Adidas ҳамда Хадид ҳамкорлиги доирасида ишланган реклама жамоатчилик орасида кескин норозиликни келтириб чиқарганини маълум қилди. Қайд этилишича, ушбу кроссовкалар дастлаб 1972 йилда Мюнхенда ўтказилган Олимпиада ўйинлари учун ишлаб чиқарилган. Ўйинлар давомида 5 сентябрь куни теракт содир бўлганди: исроиллик 11 нафар спортчи фаластинликлар томонидан ўтдирилган. 

27 ёшли Белла Хадид — асли фаластинлик бўлган, ҳозирда АҚШда яшовчи мультимиллионер Муҳаммад Хадиднинг қизи ва дунёдаги энг машҳур супермоделлардан бири. У бир неча бор аждодлари фаластинликлар эканидан ғурурланиши ҳақида гапирган. Хадид кўп йиллардан бери Фаластин мустақиллигини қўллаб-қувватлаши ҳақида оммавий баёнот бериб келади.