Adidas Германия миллий жамоаси футболкаларидан 44-рақамни олиб ташлади

Спорт товарлари ишлаб чиқарувчи немис компанияси миллий жамоанинг янги формасидаги рақамлардан бирининг дизайнига оид танқидларга жавоб қайтарди ва савдога тегишли тузатишлар киритди.

Фото: Christian Charisius/dpa/picture alliance

Спорт буюмлари ишлаб чиқарувчи Adidas компанияси ва Германия футбол иттифоқи (DFB) Германия миллий жамоасининг Евро-2024 учун янги либосидаги 44-рақам дизайни ҳақидаги танқидларга жавоб қайтарди ва уни сотувдан олиб ташлаш орқали тегишли тузатишлар киритди. Бу ҳақда dpa агентлиги 1 апрел, душанба куни Bild нашрига таяниб, танқид сабабини аниқлаган ҳолда маълум қилди: футболканинг орқа томонидаги 44-рақам Германияда миллий-социализм давридаги СС (Schutzstaffel – SS) рамзини эслатади. Март ойининг охирида журналист Тобиас Хух X ижтимоий тармоғида ушбу ўхшашликка эътибор қаратди.

Немис оммавий ахборот воситаларининг аниқлик киритишича, футболкани сотиш жараёнида «фюрер» ва «Ҳитлер» сўзларини қўшиш ҳам тақиқланган. 1 апрел куни тушдан кейин расмий Adidas онлайн-дўконида шахсий исм ва рақам билан формаларни шахсийлаштириш имкони бўлмади, DFB эса ўзининг онлайн-дўконига 44-рақам билан буюртма қилинган комбинацияларни етказиб беришни тўхтатди. «Бу бизнинг шахсийлаштириш қоидаларимизга мос келмайди. Илтимос, бошқа нарсани синаб кўринг», деган ёзув Adidas дўкони веб-сайтида маҳсулот танлаш вақтида пайдо бўлди.

«DFB ва унинг ҳамкори - 11teamsports - номлар ва рақамлар дизайни учун жавобгардир», деди Adidas вакили Оливер Брюгген dpa нашрига. У спорт товарлари ишлаб чиқарувчиси «ксенофобия, антисемитизм, зўравонлик ва ҳар қандай шаклдаги нафратга қарши туришини» таъкидлади ҳамда «бўлинувчи ёки чекка қарашларни тарғиб қилишга қаратилган ҳар қандай уриниш бренд сифатида қадриятларимизга кирмайди», деб қўшимча қилди.

Германия Евро-2024да пушти-бинафша рангларда ўйнайди

Германия футбол иттифоқи март ойи ўрталарида миллий жамоанинг янги либосини тақдим этди. Асосий бўлиб қолаётган анъанавий оқ рангдан фарқли ўлароқ, янги пушти-бинафша рангдаги меҳмон тўплами, DFB маълумотларига кўра, немис мухлисларининг янги авлоди ҳиссиётларига кўпроқ мос келади. Янги дизайн 2024 йил 14 июндан 14 июлгача Германиянинг ўнта шаҳрида бўлиб ўтадиган футбол бўйича бўлажак Европа чемпионати учун махсус ишлаб чиқилган.

Германия миллий жамоаси мухлислари янги либосни харид қилиши мумкин: болалар учун пушти-бинафша рангли футболка 75 евро ва ундан юқори туради, катталар учун энг арзон вариант эса 100 еврога тушади.

#Германия #Adidas