«Starlink учун ҳам раҳмат» - Рамзон Қодиров ва Илон Маск баҳси давом этди

Россиянинг Чеченистон ҳудуди раҳбари Рамзон Қодиров ва америкалик миллиардер Илон Маск ўртасидаги «баҳс» давом этди.

17 август куни Рамзон Қодиров томига автомат ўрнатилган Cybertruck электромобилини ҳайдади ва уни Илон Маск совға қилганини таъкидлади. У Илон Маск эгалик қиладиган Tesla компанияси томонидан ишлаб чиқарилади. Қодиров электромобил уруш зонасига юборилишини ҳам айтди.

Кейинчалик Маск совға даъвосини рад этди. У ижтимоий тармоқда шу ҳақда берилган саволга киноя билан жавоб қайтарди.

«Мен рус генералига Cybertruck совға қилдим деб ўйлайсанми? Шунчалик қолоқмисан? Бу ҳайратланарли», деб ёзди Маск ўзининг Х ижтимоий тармоғида журналист Сет Абрамсон постига изоҳ бериб. Яна бир хабарида Маск: «Сизлар эскирган оммавий ахборот воситаларининг ёлғон гапиришига яна бир мисолсиз», деб қўшимча қилди.

Чеченистон раҳбари Рамзон Қодиров бу билан тўхтаб қолмади. У Илон Маскнинг раддиясига жавобан Starlink спутник интернети учун ҳам миннатдорлик билдирди.

«Starlink учун алоҳида раҳмат. МҲО [уруш] зонасида алоқа тезлиги мутлақо зўр! Жангчилардан алоҳида ҳурмат», деб ёзди Қодиров. «Сизнинг ишланмаларингиз бизга катта ёрдам беради», деб қўшимча қилди Чеченистон раҳбари ва Маскка «қолоқ ва ташаббуссиз одамлар ва коррупцион оммавий ахборот воситаларига» эътибор бермасликни тавсия қилди.

Tesla компанияси Cybertruck электромобили сотувини 2023 йил декабр ойида бошлаган. Автомобилнинг энг ҳамёнбоп версияси 60 минг доллар туради. Санкциялар туфайли унинг сотуви Россияда расман йўлга қўйилмаган.

Шу йил феврал ойида Украина Мудофаа вазирлиги Россия фронтда SpaceX томонидан ишлаб чиқилган Starlink сунъий йўлдош терминалларидан тобора кўпроқ фойдаланаётганини маълум қилганди. Кейинчалик SpaceX асосчиси ва раҳбари Илон Маск буни рад этди. «Бизга маълумки, бирорта ҳам Starlink Россияга тўғридан-тўғри ёки билвосита сотилмаган», деб ёзди у.