«Америка, мен сенга боримни бердим». Демократик партия қурултойи Байденнинг чиқишини олқишлар билан қаршилади

«Жо, тарихий етакчилигингиз, бутун умр халқимиз учун хизмат қилганингиз ва давом эттираётган барча ишларингиз учун сизга раҳмат. Биз сиздан тоабад миннатдормиз», – деди Ҳаррис ва партиянинг барча тарафдорларини идеаллар учун курашишга чақирди.

«Сизларнинг кўпчилигингиз каби мен ҳам ўз қалбим ва кучимни шу мамлакатга бердим. Мен сизларни севаман», — деди кўзда ёш билан йиғилганларга қарата 81 ёшли президент олқишлар остида. «Биз ҳам сени севамиз, Жо» — дея ҳайқирди бир ойча вақт олдин уни кексайиб қолгани учун президентлик учун номзодини қайтариб олишга мажбур қилган партиядошлари.

«Иккимиз ҳам ҳали кўп иш қилишимиз кераклигини биламиз, аммо биз тўғри йўналишда кетмоқдамиз», — деган Байден ўзи ва бир неча ҳафта ичида президентлик пойгасида ўзгариш ясай олган Ҳаррисни назарда тутиб.

2020 йилда Америкада илк қора танли аёл вице-президент бўлишга эришган Камала Ҳаррис Демократик партияга янги ҳаёт бағишлади ва жамоатчилик ўртасидаги сўровларда республикачилар номзоди Доналд Трампдан ўзиб кетди.

У конвенциянинг сўнгги кунида саҳнага чиқиши белгилангани ҳолда анъанани бузиб, ярим асрлик фаолиятидаги энг қийин дақиқаларда Байденга катта ҳурмат кўрсатди ва саҳнага чиқиб келди.

Байден қурултойга оила аъзолари билан бирга келганди, уни рафиқаси Жилл Байден ва қизи Эшли саҳнага таклиф этди.

Ўз нутқида Байден нафақат тарихдаги ўрни ҳақида гапирди, балки ўз вице-президентига ҳурмат бажо келтириб, у Оқ уйда ўз ўрнини эгаллашига умид билдирди.

«[Ўтган сайловларда] Камалани танлаганим биринчи қарорим бўлганди ва бу бутун фаолиятим давомида қабул қилган энг яхши қароримдир, — деган у. — У қаттиққўл, тажрибали ва ниҳоятда ҳалол».

Демократлар Чикагога кўтаринки кайфиятда келишди ва ғалабага ишонишмоқда, ҳолбуки бир неча ҳафта олдин, Байденнинг Трамп билан муваффақиятсиз дебатидан кейин буни тасаввур қилиб бўлмасди.

BBC’нинг Шимолий Америкадаги мухбири Энтони Зуркер қайд этишича, президент учун олқишларни унинг президентлик пойгасидан чиқиш қарори учун миннатдорчилик белгиси сифатида ҳам, 1972 йилда, 29 ёшида эканида Конгрессга сайланганида бошланган бой сиёсий карьерасига ҳурмат бажо келтириш сифатида кўриш ҳам мумкин.

Байден ўз нутқи якунини Камала Ҳаррисга бағишлаган бўлса-да, бу оқшом чиқиш қилган ораторларнинг кўпчилиги Оқ уйнинг ҳозирги эгасига саломларини йўллашди.

Саҳнада оқшом бошида пайдо бўлган Ҳиллари Клинтон йиғилганларга мистер Байден «Оқ уйга қадр-қиммат, тартиб ва лаёқатлиликни қайтаргани»ни айтди.

Сешанба куни қурултой иштирокчилари қаршисида Барак Обама нутқ сўзлайди. Чоршанба куни эса Билл Клинтоннинг навбати келади. Уларнинг иккиси ҳам — собиқ президентлар ва ўз номзодларини иккинчи марта илгари суришганида ғолиб бўлишган. Байденда эса бундай имконият бўлмайди. Унинг қурултойдаги нутқи, агар кейинги беш ой ичида қандайдир ғайриоддий воқеа рўй бермаса, президентнинг Америка телевиениесининг бу қадар кенг аудиториясига йўллаган сўнгги мурожаати бўлиб қолади.

Америка нашрларига кўра, Байден ҳали ҳам йўлни Ҳаррисга бўшатиб беришга мажбур қилишганидан хафалиги тарқамаган — у Трампни енгишим мумкин эди деб ҳисобламоқда. Аммо у қарорга қўшилганини айтмоқда.

Нутқини якунлаб, АҚШ шарқий соҳилида ярим тун бўлганида, президент қурултойни тарк этди ва дам олиш учун Калифорнияга йўл олди.