АҚШ президенти Киевга янги ёрдам пакети бўйича маълумотни очиқлади

Украина АҚШдан яна бир ҳарбий ёрдам пакетини олади, у ҳаво ҳужумидан мудофаа тизимлари учун снарядлар, дронларга қарши жанговар жиҳозлар, шунингдек, танкка қарши ракеталар ва ўқ-дориларни ўз ичига олади. Америка Қўшма Штатлари президенти Жо Байден янги пакетнинг тафсилотларини 23 август, жума куни Оқ уй веб-сайтида эълон қилди.

Байден ёрдам пакети қанча маблағ эвазига ажратилишига аниқлик киритмади, бироқ АҚШ Мудофаа вазирлиги ўша куни унинг миқдори 125 миллион долларга (тахминан 112 миллион евро) баҳолангани ҳақида хабар берди. Пентагон маълумотларига кўра, пакетга HIMARS ялпи ўт очиш реактив тизимлари учун ўқ-дорилар, транспорт воситалари ва бошқа жиҳозлар ҳам киради.

АҚШ президентининг таъкидлашича, янги пакет эълон қилиниши рамзий бир вақтда – 24 августда нишонланадиган Украина мустақиллиги куни арафасида амалга оширилган. «Аниқ бўлсин: Россиянинг маъносиз уруши бошланганда Украина озод мамлакат эди. Бугун ҳам у эркин мамлакат. Уруш эса Украина эркин, суверен ва мустақил давлат бўлиб қолиши билан тугайди», - деди Байден. 

АҚШ уруш тарафдорларига қарши янги санкциялар киритди

Киевга янги ёрдам пакети ҳақидаги маълумотлардан ташқари, Америка етакчиси Қўшма Штатлар санкциялар рўйхатига қўшимчалар киритилганини эълон қилди. Бу ҳақда аввалроқ мамлакат Молия вазирлиги баёнот берган эди. Россия Федерацияси билан алоқадор 400 га яқин компания ва жисмоний шахсларга нисбатан санкциялар жорий этилди. Улар «Россиянинг ноқонуний урушига кўмаклашмоқда» ва Қўшма Штатлар «Россияни тажовузкорлиги учун жавобгарликка тортишга қатъий содиқ қолади», деб хулоса қилди Байден.

Бошқалар қаторида, Россия мудофаа вазири Андрей Белоусовнинг ўғли ва келини, Москва заргарлик заводи, Волга-Днепр авиакомпанияси, AirBridgeCargo, «Норильск Авиа», Магнитогорск темир-пўлат заводи, шунингдек, суюлтирилган газни ташиш учун кемалар Вашингтоннинг янги чекловлари остида қолди.