Зеленский: «Курск операцияси» – ғалаба режасининг бир қисми

Украина қуролли кучларининг Курск вилоятидаги ҳужум операцияси Киев томонидан Россия бошлаган урушда ғалаба қозониш учун тайёрланган режанинг бандларидан биридир, деди Украина президенти Володимир Зеленский. Бу йўналишнинг бир қисми аллақачон якунланган, деди у 27 август, сешанба куни Киевда бўлиб ўтган матбуот анжуманида.

Украина қуролли кучларининг Россия ҳудудида олға силжиши Украина ўтказмоқчи бўлган Россия Федерацияси вакиллари иштирокидаги тинчлик саммити билан ҳам боғлиқ, деди Зеленский.

Унинг фикрига кўра, «Курск операцияси» муваффақиятли бўлди, чунки у Харкив вилоятини босиб олишни тўхтатди, шунингдек, Украина шимолидаги Чернихив ва Суми вилоятларида Украина ва хорижий разведка хизматлари огоҳлантирган Россия ҳужумининг олдини олди. Бундан ташқари, Украина қуролли кучларининг ҳужуми давомида Россия қўшинлари катта қисми мағлубиятга учради, Россия қуролли кучлари кучларининг бир қисми Харкив ва Запорижжя йўналишларидан олиб чиқилди, дея қўшимча қилди президент.

Украинанинг ғалаба режаси Байден, Ҳаррис ва Трампга топширилади

Зеленскийнинг сўзларига кўра, Украина ғалаба режасининг иккинчи нуқтаси унинг жаҳон хавфсизлик инфратузилмасидаги стратегик ўрнидир. «Учинчи йўналиш - бу Россияни урушни дипломатик йўл билан тугатишга мажбурлашнинг кучли пакети», - деди у.

Украина раҳбари бу режани сентябр ойида АҚШ президенти Жо Байден ва ноябр ойида президентликка номзодлар Камала Ҳаррис ва Доналд Трампга етказишини айтди. Ғалаба режасини биринчи навбатда Байденга тақдим этиш «адолатли» бўларди, чунки унинг муваффақияти Киевга айтиб ўтган нарсаларни етказиб беришга боғлиқ, деди Зеленский.

«Менимча, бу режани Камала Ҳаррисга ҳам, Доналд Трампга ҳам етказиш тўғри бўлади, чунки биз АҚШ президенти ким бўлишини билмаймиз ва бу режани ростдан ҳам амалга оширишни хоҳлаймиз», деб тушунтирди у.

Зеленский: Украина Россияга қарши F-16'дан фойдаланишга тайёрланмоқда

Украина Ғарб томонидан етказиб берилган F-16 қирувчи самолётларини Россияга қарши ишлатишга тайёрланмоқда. Бу ҳақда Украина президенти Володимир Зеленский 26 август куни маълум қилди. 

«Бугун мен кунни [Украина қуролли кучлари бош қўмондони Александр] Сирский билан алоҳида узоқ суҳбатдан бошладим: биз бу ракета ҳужуми учун Россияга жавоб беришга тайёрланяпмиз. F-16’дан фойдаланиш ва Курск вилоятидаги операция учун сўнгги 24 соат ичида назорат зонасини кенгайтирдик ва алмашиш фондини тўлдирдик».

Зеленскийнинг сўзларига кўра, бошқа фронтлардаги вазият, жумладан, Россия армияси аста-секин олға силжиб бораётган ва шиддатли жанглар кетаётган Покровский йўналиши ҳам муҳокама қилинган. Бундан ташқари, Украина раҳбари энергетика объектларини Россия ҳужумларидан ҳимоя қилиш бўйича «бир қанча муҳим қарорлар» ҳақида эълон қилди, аммо тафсилотларни келтирмади.