Эрон президенти пойтахтни мамлакат жанубига кўчириш зарурлигини маълум қилди

Теҳронни мавжуд муаммолари билан ривожлантиришга уриниш – вақтни беҳуда сарфлаш, деб ҳисобламоқда давлат раҳбари.

Фото: AP

Эроннинг иқтисодий ва сиёсий марказини мамлакат жанубий қирғоқларига яқинлаштириш керак, чунки Теҳрон пойтахт сифатида ечим топиб бўлмайдиган муаммоларга эга. Бу ҳақда Эрон президенти Масъуд Пизишкиён маълум қилди, деб хабар берди Fars.

«Ҳозирги тенденцияни давом эттириб, мамлакатни ривожлантириш мумкин эмас. Агар биз Теҳронга жанубдан ва денгиздан ресурслар олиб келишни, кейин уларни маҳсулотга айлантириб, экспорт учун яна жанубга жўнатишни давом эттирмоқчи бўлсак, бу бизнинг рақобатбардошлигимизни тобора пасайтиради», деб тушунтирди Пизишкиён.

Теҳронни мавжуд муаммолари билан ривожлантиришга уриниш – вақтни беҳуда сарфлаш, деди у. Муаммолар қаторида президент сув танқислиги, ҳавонинг ифлосланиши ва тупроқнинг чўкишини тилга олди.