9 сентябрнинг асосий янгиликлари: Ўзбекистонда рўй берган муҳим воқеа ва ҳодисалар

Паралимпичиларнинг муваффақиятли иштироки, вазирликлардаги бизнесмен амалдорлар, рекорд даражага етган олтин-валюта захиралари — кун давомида Kun.uz’да ёритилган Ўзбекистон янгиликлари билан таништирамиз.

Паралимпиадада ҳам 13-ўрин

2024 йилги Паралимпия ўйинлари 8 сентябр, якшанба оқшомида Париждаги тантанали маросим билан якунланди. Шоуни Парижнинг Сен-Дени чеккасидаги «Стад де Франс» стадиони трибуналарида 64 минг томошабин кузатиб борди. 

XVII Паралимпия ўйинлари 28 августдан 8 сентябргача бўлиб ўтди. Париж Паралимпия ўйинларида 22 спорт тури бўйича беллашувлар ўтказилди.

Ўзбекистонлик спортчилар умумий медаллар ҳисобида 10 та олтин, 9 та кумуш ва 7 та бронза медалини қўлга киритиб, 13-ўринни эгаллади. Бу ўзбек спортчиларининг тарихий рекорд натижасидир.

Ўзбекистон паралимпиячилари Осиё қитъасида 3-ўрин, постсовет давлатлар ичида 2-ўрин ва турк дунёси ва ислом дунёси давлатлари ичида олимпиячиларимиз сингари 1-ўринни эгаллади.

Хитойлик спортчилар яна энг кўп медалларни қўлга киритди — 220 та, улардан 94 таси олтин медал.

Вазирликлардаги бизнесмен амалдорлар

Учта вазирликнинг қарийб 400 нафар бошқарув ходими тадбиркорлик билан шуғулланиб келгани маълум бўлди.

Аксилкоррупция матбуот хизматига кўра, ўрганишларда Қурилиш ва уй-жой коммунал хўжалиги, Сув хўжалиги ҳамда Қишлоқ хўжалиги вазирликлари ва уларнинг тизим ташкилотларида фаолият юритаётган 398 нафар бошқарув ходими 449 та тадбиркорлик субъектида таъсисчилик асосида фаолият юритиб келаётгани аниқланди. Жумладан:

• Қурилиш ва уй-жой коммунал хўжалиги вазирлигининг 93 нафар бошқарув ходими 112 та тадбиркорлик субъектида;
• Сув хўжалиги вазирлигининг 26 нафар бошқарув ходими 35 та тадбиркорлик субъектида;
• Қишлоқ хўжалиги вазирлигининг 279 нафар бошқарув ходими 302 та тадбиркорлик субъектида таъсисчилик асосида фаолият юритиб келган.

Энг кўп тақсимот ва рухсат бериш ваколатига эга вазирликларда амалдорларнинг бизнес билан машғуллиги ҳайратланарли албатта.

Агентликка кўра, юқоридаги ҳолатларини бартараф этиш бўйича вазирликларга тақдимномалар киритилиб, қайд этилган қонунбузилиши ҳолатларига чек қўйилган.

Ўзбекистонга машҳур бренд кирмоқда

Белгиянинг машҳур Le Pain Quotidien халқаро ресторанлар тармоғи ва Ўзбекистоннинг "RestofFoods" компанияси ўртасида ҳамкорлик тўғрисидаги битим имзоланди.

Ҳужжатга кўра, Le Pain Quotidien ресторанлар тармоғи яқин вақт ичида Ўзбекистонда ўз фаолиятини йўлга қўяди.

Дунёга машҳур бренднинг кириб келиши Ўзбекистон фуқаролари ва меҳмонлари учун мамлакат жозибадорлигини янада оширишга хизмат қилади.

Муаллифлик рецепти асосида тайёрланадиган маҳсулотлар, жумладан нон, турли хил салатлар, сэндвичлар, ичимликлар, тарталетка ва тартинлари билан мушҳур Le Pain Quotidien халқаро ресторанлар тармоғи 1990 йилда Брюссел шаҳрида Ален Кумон томонидан ташкил этилган. Ушбу тармоқнинг 260 дан ортиқ ресторанлари дунёнинг 20 дан ортиқ давлатларида мавжуд.

Гидроцикллар ва сув скутерларига рухсат берилади

Ҳукуматнинг сув ҳавзаларида моторли (ички ёнув двигателли) ва электромоторли сув транспорти воситаларидан фойдаланиш тартибини янада такомиллаштириш ҳамда фуқаролар хавфсизлигини таъминлаш чора-тадбирлари тўғрисидаги қарори қабул қилинди.

Унга кўра, 2025 йил 1 майдан бошлаб табиий ва сунъий сув ҳавзаларида фақат тезликни автоматик пасайтириш ускунаси билан жиҳозланган, GPS ускунаси ўрнатилган ҳамда миллий GPS мониторинг ва навигация тизимига уланган моторли ва электромоторли сув транспорт воситаларидан фойдаланишга рухсат этилади.

Бунга сув ҳавзаларида туризм хизматларини ривожлантириш, шунингдек, фуқаролар ҳаёти, соғлиғи ва хавфсизлигини таъминлаш ҳамда сув ресурслари ифлосланишининг олдини олиш, улардан оқилона фойдаланишни йўлга қўйиш мақсадида қарор қилинди

Сув транспорт воситаларининг рухсат этилган ҳаракатланиш максимал тезлиги 40 километр/соат, кемалар тўхташ жойлари ҳамда аҳоли турар жойлари чегараларида — 20 километр/соат, пляжлар ва аҳолининг оммавий дам олиш жойлари чегараларида эса — 5 километр/соат этиб белгиланади.

2025 йил 1 январдан бошлаб электр моторли сув транспортларидан ташқари сув транспорти воситаларидан фойдаланиш натижасида атроф-муҳит ифлослантирилгани учун йиллик компенсация тўловлари ҳам ундирилади.

Экспортчилар учун ҚҚСни қоплаш тартиби соддалаштирилди

Эндиликда экспорт операциялари бўйича қўшилган қиймат солиғи (ҚҚС) суммаси ўрнини қоплаш осонлашади. Бу ҳақда бизнес-омбудсман хабар қилди.

Президент фармонига кўра, солиқ тўловчилардан товарларнинг экспорт қилинганини тасдиқловчи божхона ҳужжатларини солиқ органларига тақдим этиш талаб қилинмайди.

Божхона органлари томонидан электрон тарзда тақдим этилган маълумотлар экспортни тасдиқлаш учун етарли ҳисобланади.

Ушбу янги тартиб фармон кучга киргунга қадар бўлган даврдаги ҚҚСни қоплаш учун берилган аризаларга ҳам татбиқ этилади.

Олтин-валюта захираларимиз рекорд даражага етди

Ўзбекистоннинг олтин-валюта захиралари 39 млрд долларга етди. Бу – рекорд кўрсаткич. Йил бошидан буён захиралар қиймати 4,6 млрд долларга ёки 13,3 фоизга ошган.

Олтин-валюта захираларининг жорий қиймати – маълумотлар очиқлана бошлаган 2018 йилдан кейинги даврдаги энг юқори кўрсаткич бўлиб турибди.

Август ойида халқаро активлар қиймати 1,75 млрд долларга ёки тахминан 4,7 фоизга ошган. Июлдаги ўсиш 1,06 млрд долларга тенг бўлганди.

Аммо ташқи қарз ҳам рекорд даража — 61,1 млрд долларга етган. Бунинг ичида давлат қарзи 37 млрд долларни ташкил этади.