Европа Иттифоқи Tesla ва Хитойда ишлаб чиқарилган электомобиллар учун божларни камайтиради

Еврокомиссия ХХР билан юзага келган ноҳақ рақобат можароси доирасида Tesla томонидан Хитойда ишлаб чиқарилган электромобиллар ҳамда бир қанча хитойлик ишлаб чиқарувчиларнинг электромобиллари учун антидемпинг божлари миқдорини камайтиради.

Tesla учун мўлжалланган ҳимоя божи 9 фоиздан 7,8 фоизга, Хитойнинг Geely компанияси учун эса 19,3 фоиздан 18,8 фоизга туширилади.

Шу билан бирга, BYD автомобилсозлик компанияси учун белгиланган 17 фоизли ставка сақлаб қолинади, Европа Иттифоқи билан ҳамкорлик қилишдан бош тортган SAIC ҳамда бошқа компаниялар маҳсулотлари учун жорий этилган 35,3 фоизли ставка ҳам ўзгаришсиз қолади. Мазкур божлар Европа Иттифоқига автомобилларни олиб киришда ундириладиган одатдаги 10 фоизли божларга қўшимча ҳисобланади.

Шу билан бирга, ХХР Еврокомиссия билан савдо ва иқтисодий можароларни тартибга солиш ҳамда Хитойда ишлаб чиқарилган электромобиллар учун божларни камайтириш бўйича музокаралар ўтказишга тайёрлигини тасдиқлади.

«Хитой ҳар икки томоннинг ҳам манфаатларига жавоб берадиган ва Жаҳон савдо ташкилоти қоидаларига мос келувчи қарорга келишда Европа томони билан яқиндан ҳамкорликни давом эттиришга тайёр», — дейилади Савдо вазирлиги хабарида.

Ўтган ҳафта Хитой савдо таранглигини юмшатиш истагини билдириб, Европа Иттифоқи томонидан ишлаб чиқарилган брендларга антидемпинг чораларини қўллашдан бош тортиши мумкинлигини маълум қилганди.

Хитойда ишлаб чиқарилган электромобилларга қўлланиладиган божлар бўйича якуний қарор Европа Иттифоқининг барча 27 та давлати томонидан биргаликда қабул қилиниши керак.

Август охирларида АҚШ ортидан Канада ҳам Хитойда ишлаб чиқарилган электромобиллар импортига 100 фоизлик бож тўлови белгиланишини эълон қилгани тўғрисида хабар берилганди. Бундан ташқари Хитой пўлати ва алюминийсига 25 фоиз бож жорий этиш режалаштирилган.