Хитойлик аёл фарзандини тарбиялаш учун ишга юборди. Ўсмир эса бойиб кетиб, ўқишни ташлади

Хитойда она 17 ёшли ўғлига пул топиш қанчалик қийинлигини кўрсатиш учун уни кўча егуликларини сотадиган дўкончага ишга юборди. Аммо ўсмир бойиб кетиб, ўқишни ташлади, деб хабар бермоқда South China Morning Post.

Ўғлининг ўқишдаги ўзлаштириши пасайгани сабабли она унга сабоқ бермоқчи бўлган. Ўзи бир неча йил давомида шундай дўкончада ишлаган аёл ўғли Шен катталар ҳаётининг оғир қийинчиликларига дуч келса, таълим олишга жиддий ёндашади, деб ўйлаган.

10 кун ичида йигит кўча егуликлари савдосидан 1400 доллар ишлаб топди. Натижада ўсмир бизнесмен бўлишга қарор қилди. У “ўқиш бефойда” деган ўй билан ўзи таҳсил олаётган ошпазлик мактабини ташлади.

Сотаётган егуликларини Шеннинг ўзи тайёрлайди. Онасининг сўзларига кўра, у ҳар куни эрталаб соат 09:00 да иш бошлаб, ярим тунгача дўконда қолиб кетади.

“Ўғлим жуда тиришқоқ. Унинг ишга бунчалик берилиб кетишини кутмагандим”, — деди Шеннинг онаси.

Ўсмирнинг биринчи мақсади — уч ғилдиракли электр велосипед учун пул ишлаш. Шеннинг онаси ўғлининг ўқишни ташлаш қарорига кўникди.

Аввалроқ АҚШда 12 ёшли бола хайрияга маблағ тўплаш учун уйда тайёрланган музқаймоқлар дўкончасини очганди, аммо кўп ўтмай шаҳар маъмурияти уни ёпди. Дўкон ёпилганига қарамай, бола қолган музқаймоқни тарқатишга қарор қилган ва якунда 20 минг доллар йиққан.