Россиядаги ЙТҲда ўзбекистонлик ҳалок бўлди

Тюмен областида юк машинаси ва енгил автомобил тўқнашган.

Фото: Тюмен вилояти давлат транспорт инспекцияси

Россиянинг Тюмен областида содир бўлган йўл-транспорт ҳодисасида ўзбекистонлик эркак ҳалок бўлди.

Қайд қилинишича, «Тюмен - Ханти-Мансийск» автомобил йўлининг 178-километрида ГАЗ юк машинаси ва ВАЗ 2107 тўқнашиб кетган.

Тюмен области йўл полицияси маълумотларига кўра, енгил автомобил ҳайдовчиси воқеа жойида вафот этган. У Ўзбекистоннинг 55 ёшли фуқароси экани ва Россияда ноқонуний яшагани таъкидланмоқда. Жабрланувчининг исми-шарифи хабарда келтирилмаган.

Дастлабки маълумотларга кўра, машиналардан бири қарама-қарши йўналишга чиқиб кетган. Юк машинасининг 24 ёшли ҳайдовчиси жароҳатланган. Иккала автомобил ҳам жиддий шикастланган.

Ҳолат юзасидан суриштирув ишлари бошланган.