Қўшимча функционаллар
-
Тунги кўриниш
ЕИ Россияга ракета етказиб бергани учун Эронга қарши санкциялар жорий қилади
Эрон ракеталарининг Россия Федерациясига етказиб берилиши Европа хавфсизлигига тўғридан тўғри таҳдиддир, деди Европа Иттифоқи дипломатияси раҳбари Жозеп Боррел. У Европа Иттифоқининг жавоби тез ва мувофиқлаштирилган бўлишига ваъда берди.
Европа Иттифоқи Эроннинг Россияга ракета етказиб берганини қоралади ва Теҳронга қарши янги санкциялар жорий этиш билан таҳдид қилди. «Европа Иттифоқи бир неча бор Эронни Россияга баллистик ракеталар етказиб бермаслик ҳақида қатъий огоҳлантирди», — деб ёзди Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел 13 сентябр, жума куни.
Боррелнинг сўзларига кўра, Эронга қарши янги ва муҳим санкциялар жорий этилиши мумкин. Жазо рўйхатига Эроннинг баллистик ракета ва дрон дастурлари билан алоқадор шахслар ва компаниялар киради.
Аввалроқ шу ҳафтада Франция, Германия ва Британия Теҳронга қарши янги санкциялар эълон қилган эди. Россияга қурол етказиб берувчи компанияларга, жумладан, Европанинг қатор шаҳарларига парвоз қилаётган Iran Air авиакомпаниясига нисбатан жазо чоралари жорий этилди.
Франция Эрон дипломатик миссияси раҳбарини чақиртирди
Франция 13 сентябр куни Эроннинг Париждаги муваққат ишлар вакилини Ташқи ишлар вазирлигига чақириб, ундан Украинага қарши урушда фойдаланиш учун Россияга ракеталар етказиб берилгани ҳақидаги тахминларга изоҳ беришни талаб қилди.
Аввалроқ АҚШ давлат котиби Энтони Блинкен Россия Эрондан баллистик ракеталар олганини айтган эди. Теҳрон ҳукумати бу айбловларни қатъиян рад этди. Ўтмишда Эрон Россияга учувчисиз учиш аппаратлари етказиб берганини қатъиян тан олмаган, дея қайд этади dpa агентлиги.
