Microsoft ижтимоий тармоқларда Камала Ҳаррисни қоралашга қаратилган «Кремл ботлари» фаоллашганини аниқлади

Охирги икки ой ичида ижтимоий тармоқларда Россияга алоқадор гуруҳлар томонидан Демократик партия номидан АҚШ президентлигига номзод Камала Ҳарриснинг сайловолди кампаниясини обрўсизлантиришга қаратилган видеоларни тарқатиш кўпайди. Бу ҳақда Microsoft компаниясининг ҳисоботида сўз боради.

Мисол сифатида Х ижтимоий тармоғида миллионлаб маротаба томоша қилинган иккита видео келтирилган. Улардан бирида Ҳаррис тарафдорларидан бири экани айтилаётган шахс президентликка номзод Доналд Трампнинг сайловолди митинги иштирокчисига ҳужум қилгани тасвирланган. Бошқа бир роликда эса Ҳаррис 2011 йилда Сан-Франсискода автомобил бошқараётиб 13 ёшли қизни уриб юборган ҳолда ЙТҲ содир этгани айтилади.

Мазкур видеолар маҳаллий ОАВга ўхшатиб бир неча кун олдин яратилган сайт орқали тарқатилган. Microsoft мазкур роликларнинг эълон қилинишига Кремлнинг «троллар фабрикасига» боғлиқ «Шторм-1516» гуруҳи жавобгар эканини маълум қилди.

Ҳарриснинг ЙТҲга боғлиқ тарихини ўрганган лойиҳа ушбу ролик Россиядаги кўплаб машҳур Telegram-каналларда ҳам тарқатилганини таъкидлади. Роликни ўрганиш жараёнида, ундаги рентген суратлари 2010 ва 2017 йиллардаги илмий мақолалардан олингани маълум бўлди. Бундан ташқари, Сан-Франциско полицияси 2011 йилда юз берган ЙТҲга оид маълумотлар мавжуд эмаслигини билдирди.

Ҳаррис билан боғлиқ роликлар, шунингдек, «Шторм-1679» гуруҳи ҳам шуғулланмоқда. Шу каби роликларнинг бирида Ҳарриснинг ёлғон сиёсий қарашлари келтирилган Ню-Йоркдаги сохта реклама баннери намойиш этилган. Microsoft ушбу гуруҳни ҳам Кремл билан боғламоқда.

Microsoft ҳисоботида келтирилишича, олдинроқ ижтимоий тармоқлардаги бундай хабарлар асосан Жо Байденга қаратилган, аммо у президентлик пойгасидан чиққач, Ҳарриснинг сайловолди кампанияси диққат марказидан ўрин олган. АҚШда президентлик сайловлари яқинлашар экан, Microsoft Россияга алоқадор гуруҳлар сиёсий муҳитга таъсир кўрсатишга қаратилган контентни ижтимоий тармоқларда тарқатишни давом эттиришини айтмоқда.