Қирғизистонда коррупционерлар ва уларнинг қариндошларига давлат лавозимида ишлаш тақиқланади

Энди порахўр амалдорлар қамоқхонада бўлади, уларнинг яқин қариндошларига давлат лавозимларида ишлаш тақиқланади. Бу ҳақда Қирғизистон Миллий хавфсизлик давлат қўмитаси (МХДҚ) раҳбари Қамчибек Ташиев маълум қилди.

Ташиев мамлакатда коррупция даражаси пасайганига қарамай, давлат органларида ҳамон муаммо бўлиб қолаётганини таъкидлади. Унинг таъкидлашича, коррупция жинояти учун ҳибсга олинган айрим шахслар баъзан яна озодликка чиқмоқда, бу эса ҳуқуқни муҳофаза қилиш органларини «чарчатиб юборяпти».

«Биз коррупционер амалдорларни қамаяпмиз, лекин улар яна озодликка чиқариляпти. Тўғрисини айтсам, бундай курашлардан аллақачон чарчаганмиз», деди у.

Қайд қилинишича, МХДҚ янги қонун лойиҳасини ишлаб чиқди, унга кўра коррупционер мансабдор шахслар давлат органларида ишлашдан умрбод четлатилади.

«Ҳозир коррупционерлар жарима тўлаб, 1-2 йилдан кейин давлат хизматига қайтиб, ноқонуний хатти-ҳаракатлар қилишда давом этмоқда. Аммо энди жарима ўрнига ҳақиқий қамоқ жазоси қўлланади», деди Қамчибек Ташиев.

Шунингдек, у коррупционерларнинг қариндошлари, жумладан, болалари ва ака-укаларини давлат хизматига киритмаслик кераклигини таъкидлади.

«Акс ҳолда коррупция авж олишда давом этади. Бундан буён ҳеч бир порахўр амалдор қамоқдан қочиб қутула олмайди, уларга нисбатан муддатидан олдин шартли озод қилиш меъёри қўлланмайди. Коррупционер — давлатнинг биринчи рақамли душмани», деб хулоса қилди Ташиев.